Konfederasyona Sendîkayên Kedkarên Cemaweriyê (KESK), Konfederasyona Sendîkayên Karkerên Şoreşger (DÎSK), Yekitiya Odeyên Mîmar û Endezyarên Tirk (TMMOB) û Yekîtiya Bijîşkên Tirk (TTB) bi awayekî hevpar starta kampanyaya “Em ne OHAL, demokrasiyê dixwazin” dan destpêkirin. Wê di çarçoveya kampanyayê de gelek çalaki bên lidraxistin û wê bi nûnerên gelek saziyan re hevdîtin bên çêkirin. Serokê Giştî yê DÎSK’ê Kanî Beko kampanyaya navborî nirxand. Beko got ku OHAL’ê herî zêde zirar daye karker û kedkaran û divê hemû kesên doza demokrasiyê dikin bertekên xwe nîşan bidin. 

 

WÊ BI CHP Û HDP’Ê RE HEVDÎTIN BÊN ÇÊKIRIN 

 

Beko, diyar kir ku hevdîtinên wan ên bi gelek derdoran re didomin û ew plansaziya demeke kurt û navîn dikin. Beko got ku pêşaniya wan a ewil ew e ku komcivîneke OHAL’ê çê bikin û ji bo rakirina OHAL’ê û têkeve rojeva Meclisê ew ê bi HDP û CHP’ê re hevdîtinan çê bikin. Beko dest nîşan kir ku ji bo têkoşîneke hevpar ew ê bi hemû saziyên ku siyaseteke demokratîk dikin re hevdîtinan çê bikin. Beko ev tişt gotin: “Mixabin welatê me li ber felaketeke mezin e. Bedêla vê kampanyaya me ya rêxistinên kedkaran çi dibe bila bibe, em ê bitêkoşin.” 

 

WÊ MAL BI MAL BIGERIN 

 

Beko, diyar kir ku piştî OHAL’ê bi hezaran kes betal mane û di vê pêvajoyê de herî zêde karker û kedkara tahde dîtine. Beko têkildarî vê kampanyayê wiha got: “Her kesê ku dibe ez mirov im, divê bitêkoşe.” Beko, dest nîşan kir ku ji bilî hedefa wan a çêkirina komcivînekê, ew ê belavokan derxînin fabrîke bi fabrîke û mal bi mal bigerînin. Beko, dest nîşan kir ku piştî wan ji karker û kedkaran re zirarên OHAL’ê vegotin vê carê jî ew ê bi meş û mîtîngan li qadan bin. Beko, ji bo rakirina OHAL’ê bang li rêxistinên demokratîk kir da bi awayekî hevpar bitêkoşin. 

 

MA / Metîn Yoksun