
Nivîskarê ‘Kûçikê Stalîn’: Armanca sereke ya şanoya kurdî hebûn e 

2023-01-15 09:05:42


	ENQERE - Nivîskarê lîstika “Kûçikê Stalîn” Zinar Ataman diyar kir ku şano ji bo zindîhiştina ziman, çand û dîrokê girîng e û wiha got: “Armanca me ya sereke ew e ku em bi awayek azad li her deverê derkevin pêşberî temaşevanan û hebûna xwe bidin nîşandan.”

	&nbsp;

	Lîstika “Kuçikê Stalîn” ji aliyê Alan Theatre ve hatiye amadekirin. Lîstik dê di 18’ê çile de li Enqereyê derkeve pêşberî şanohezan. Zinar Ataman nivîskariya lîstikê kiriye û ew bi tena serê xwe dileyîze. Zimanê lîstikê kurmancî ye. Bi çavên kûçikekî ku di sala 1942’an de li laboratûwarên Pavlov birçî mabû û bi awayekî hovane hat perwerdekirin ku di bin tankên Alman de bê teqandin, qala çîroka bi hezaran kurdên ku di sala 1937’an de ji Kurdistana Sor sirgûnî Asyaya Navîn, Qazaxistan û Qirgizistanê hatin kirin dike û li gel vê serpêhatiyê jî her wiha lîstik qala şer û wêrankirin demê Şerê Cîhanê yê Duyemîn dike.&nbsp;

	&nbsp;

	Nivîskar û lîstikvanê lîstikê Ataman ji navçeya Elkê ya Şirnexê ye. Ev 10 sal in xebatên xwe yên ku di sala 2013'an de li Şanoya Bajêr a Enqereyê dest pê kir, didomîne. Ataman 10 sal li qada şanoyê dixebite û nêzî 6 salan jî bi perwerdeyên cur bi cur li ser şanoyê kar kiriye. Yekemîn lîstika xwe ya kurdî û yekemîn lîstika xwe ya yek kesî bi lîstika Rênas Jiyan a bi navê "Di Tuwaletê De" di sala 2019'an de amade kiribû. Ataman bi lîstika xwe ya ewil li 7-8 deveran derket pêşberî temaşevanan. Lîstikvan pêvajoya pandemiyê jî bi nivîsandin û amadekirina lîstika “Kûçikê Stalîn” derbas kiriye.&nbsp;

	&nbsp;

	Ataman diyar kir ku lîstika wî qala serpêhatiyên sirgûnên 1937 û 1942’an de li Kurdistana Sor qewimîne dike û wî serpêhatiyan kiriye yek û bi çavê kuçikekî li Şerê Cîhanê yê Duyemîn, li sirgûnên wê demê û mirovan dinêre.&nbsp;

	&nbsp;

	‘ARMANCA SEREKE NÎŞANDANA HEBÛNÊ YE’&nbsp;

	&nbsp;

	Bi domdarî Ataman da zanîn ku cara ewil dê lîstik were pêşandan. Ataman anî ziman ku bi pandemiyê re krîza aborî tesîrek neyînî li ser wan jî kiriye û wan li ser malpera platforma sosyal a bi navê “fongogo” daxwaza alîkariyê kirine û bi qasî wan xwestiye piştevanî wernegirtine. Ataman da zanîn ku şert û mercên şanoya tirkî û şanoya kurdî newek hev in û wiha got: “Çimkî di şanoya kurdî de pirsgirêka ewil a ne tengezariya madî ye. Tişta pêwîst xwebûn e û vekirina qada wê ye. Tu demê li navçe û navendên em dixwazin nikarin lîstika xwe nîşan bidin. Wexta me sala bihûrî bi qedexeyan re derbas bû. Em bi awayek azad nikarin lîstik, çand û lîstîka xwe derxin ser dikan. Em di vî warî de tengasiyan dikişînin. Lewma ye ku armanca me ewil ne aborî ye, armanca me ewil e ku em biazadî li her deverê derkevin pêşberî teşamevanan. Divê ku şert û merc bên avakirin ku temaşevan bitirs neyên lîstikê. Pêwîste zextên dewletê rabin û lîstik werin nîşandan. Niha armanca sereke ya şanoya kurdî, hunera kurdî û siyaseta kurdan ew e ku dikaribin bi hebûna xwe hebin.”&nbsp;

	&nbsp;

	PARASTINA ZIMAN&nbsp;

	&nbsp;

	Di berdewamê de Ataman destnîşan kir ku ji bo ziman, çand û dîrok zindî bimîne piştgiriya şanoyê gelekî girîng e û ev tişt anî ziman: "Niha mirov dikare bi şanoyê ev ziman, wêje û çanda bi salane hatiye qedexekirin û bi asîmilasyonê re rûbirû hatiye hiştin zindî bihêle û jê rizgar bike. Lewma divê her dem piştgiriya şanoya kurdî bê kirin.”&nbsp;

	&nbsp;

	Ataman şanohez vexwend nîşandana lîstika xwe ya dê di 18’ê çile de pêk were.&nbsp;

	&nbsp;

	MA / Zemo Aggoz

	&nbsp;