Eskeran hawîrdorparêzên ku xwestin li Çemê Zîlan lêkolînê bikin asteng kirin 

2021-06-05 16:06:46


	 

	WAN - Eskeran rêveberên ÇEV-DER û TEMA’yê ku ji ber Roja Hawîrdorê ya Cîhanê xwestin li ser Çemê Zîlanê lêkolînê bikin asteng kirin. 

	 

	Reveberên Komeleya Hawîrdorê ya Wanê (ÇEV-DER) û Weqfa Parastina Heyînên Xwezayî, Dar Danînê û Têkoşîna bi Erozyonê re ya Tirkiyeyê (TEMA) ji ber Roja Hawîrdorê ya Cîhanê xwestin li ser Çemê Zîlan ê li Gundê Wêranê yê navçeya Erdîşê lêkolînê bikin, lê eskeran bi hêceta qedexeya çalakiyan heye şande asteng kir. 

	 

	Ligel ku Serokê ÇEV-DER’ê Alî Kalçik, diyar kir ku daxuyaniyê nadin çapemeniyê, wê tenê lêkolînê bikin jî eskeran girse asteng kir. Kalçik, anî ziman ku ji bo çem û derdor qirêj nebin hatine heremê û bi gotinên “Tişteke ku girêdayî nêrîna siyasî nîne. Ev têkildarî pêşeroja we ye. Ev ne daxuyaniya çapemeniyê ye” bertek nîşanî eskeran da. Ji ber astengkirina eskeran, şande bêyî ku lêkolînan bike ji herêmê veqetiya. Ji bo şandeya ku ji 4 kesan pêk tê hejmareke zêde ya esker, polîs û cerdevanan şandin heremê. Esker û polîsan heta derketina navçeyê rêveberên komeleyê şopandin.