
HDP'ê ji bo Babê Şêx peyama sersaxiyê weşand 

2020-10-03 12:00:30


	NAVENDA NÛÇEYAN - HDP'ê bi boneya koça dawî ya rêberê giyanî yê civaka êzidî Babê Şêx peyama sersaxiyê weşand û ji malbat, civaka êzidî û gelên Kurdistanê re sersaxî xwest&nbsp;

	&nbsp;

	Partiya Demokratîk a Gelan (HDP) ji ber koça dawî ya rêberê giyanî yê civaka êzidiyan peyama sersaxiyê weşand.&nbsp;

	&nbsp;

	Peyama bi îmzeya Hevserokên Giştî yên HDP'ê Pervîn Bûldan û Mîthat Sancar hat belavkirin wiha ye:

	&nbsp;

	"Bi xemgîniyeke mezin em hîn bûn ku rêberê giyanî yê civaka Êzidiyan, serokê rêdar yê mirovatiya kevnar, cihgirê her heft milyaketan, şagirt û bîrdariyê aqil, Babê Şêx, li Hewlêrê di 87 saliya xwe de ji nav me bar kir û çû ser dilovaniya Yezdan.&nbsp;

	&nbsp;

	Babê Şêx, di temamî serboriya jiyana xwe de bi xizmet û xebata xwe, bû pişt û dengê civaka Êzidiyan. Di 60 saliya emrê xwe de, hem rola xwe ya di nava civakê de bi serkeftî û serfirazî lîst, û hem jî ji aliyê têkiliyên aştî û biratiyê ya bi gelên cîran re bandoreke giring û mayînde ava kir.&nbsp;

	&nbsp;

	Babê Şêx, di dema fermana 73’yan de, jinên Êzidî yên ku ji aliyê hovan ve hatibûn revandin, wek berpirsyariyeke mezin û serbilindahiyeke pak dîsa qebûl kir û rola xwe ya manewî di nav civaka Êzidiyan de bi serfirazî lîst. Bi vê gava bêhempa wî di mêjûyê Êzidiyatiyê de riyeke nû vekir.&nbsp;

	&nbsp;

	Babê Şêx, di seranserî jiyana xwe de her gav berê xwe da roja pîroz û bi hêviyeke mezin ji bo 72 miletan dua kir. Bi saya kerema wî, civaka Êzidiyan bi cîhanê re têkiliyeke nû ava kir. Qedem guhaztina wî wendahiyeke mezin e hem ji bo Êzdiyan û hem jî ji bo temamî gelên Kurdistanê.&nbsp;

	&nbsp;

	Ji ber koça dawî ya Babê Şêx, em gelek xemgîn in. Bi vê minasebetê, em sersaxiyê li malbata wî, li civaka Êzidiyan û li temamî gelên Kurdistanê dikin. Serê me sax be, cihê wî bihuşta baqî be!

	&nbsp;

	Pervîn Buldan –Mîthat Sancar

	Hevserokên Giştî yên HDP’ê"&nbsp;