Ji bo lêkolîna bûyera helîkopterê wê li benda encama lêpirsînê bê sekinandin

2020-10-14 13:27:18


	ENQERE – Serokê Kômîsyona Lekolînkirina Mafê Mirovan a Meclisê Hakan Çavûşoglû yê AKP’î, daxwazên muxalefetê yên avakirina komîsyonê ya ji bo lêkolînkirina bûyera avêtina 2 welatiyan a ji helîkopterê qebûl nekir û got ku wê li benda lêpirsînên îdarî û edlî yên derbarê bûyerê de hatine destpêkirin bê sekinandin. 

	 

	Li civîna Komîsyona Lêkolînkirina Mafên Mirovan a Meclîsê, li ser kuştina Servet Tûrgût nîqaş hate kirin ku Tûrgût li navçeya Şaxê ya Wanê ji aliyê leşkerên Tirk ve ji helîkopterê hatibû avêtin. Di civînê de hate xwestin ku komîsyonek ji bo lêkolînkirina mijarê bê avakirin, lê belê AKP-MHP'ê vê daxwazê qebûl nekirin. Ev yek bû sedema nîqaşê.

	 

	Parlamentera HDP'ê ya Mûşê Gulistan Kiliç Koçyîgît li civînê axivî û got,"Mixabin komîsyona me di vê mijarê de ji bo civînekê bang nekiriye, her wiha banga ji bo lêkolînkirina bûyerê jî ji nedîtî ve hatiye. Dixwazim bêjim ku ev yek binpêkirina berpirsyarî û wezîfeya komîsyonê ye."

	 

	LI BENDA ENCAMÊ NE!

	 

	Serokwekîlê Komîsyona Lêkolînkirina Mafên Mirovan a Meclîsê û Parlamenterê CHP'ê yê Stenbolê Sezgîn Tanrikûlû jî diyar kir ku divê komîsyona jêrîn bê avakirin. Serokê Komîsyonê yê AKP'î Hakan Çavûşoglû jî got, "Em ê li benda encama lêpirsînê bin" û diyar kir ku di vê astê de ew nikarin komîsyonê ava bikin.

	 

	HDP’’IYAN BERTEK NÎŞAN DA

	 

	Koçyîgît a HDP'ê nerazîbûn nîşanî Çavûşoglû da û got, "Pêvajoya darizandinê bidome jî komîsyon dikare li cihê bûyerê lêkolînê bike û raporê amade bike." Parlamenterê HDP'ê yê Kocaeliyê Omer Farûk Gergerlîoglû jî bang li serokê komîsyonê kir ku biçe Wanê û bipirse bê li Wanê çi qewimiye.