Rojnameger Dûrgût a di bin çavan de wê bibin Wanê

2020-12-18 11:15:10


	ŞIRNEX - Rojnameger Zeynep Dûrgût a ku dema nûçe dişopand hat binçavkirin wê bibin Wanê.

	 

	Nûçegihanên me Zeynep Dûrgût û Azad Kaya û nûçegihanên Jinnewsê Rojda Aydin û Derya Ren, duh êvarî piştî şopandina nûçeyê dema ji Şirnexê ber bi Cizîrê ve dihatin, di têketina navçeyê de ji aliyên polîsan ve hatin binçavkirin. Polîsan, berê çekan dan erebeya ku rojnameger tê de bûn, pêşiya wê girt û nasnameyên rojnamegeran di GBT’yê re derbas kirin.

	 

	Rojnameger Azad Kaya, Rojda Aydin û Derya Ren piştî demekê serbest hatin berdan. Lê ji ber ku derbarê nûçegihana me Zeynep Dûrgût de lêpirsîneke ku Serdozgeriya Komarê ya Wanê dabû destpêkirin hebû hat binçavkirin. Hat diyarkirin ku nûçegihana me Zeynep Dûrgût, di çarçoveya lêpirsîna Serdozgeriya Komarê ya Wanê de ku derbarê nûçeya Osman Şîban û Servet Tûrgûtên ji helîkopterê hatibûn avêtin de hatiye binçavkirin. Polîsan destên Dûrgûtê ji paş ve kelemçe kirin û wê birin Midûriyeta Polîsan a Şirnexê. Tê payîn ku Dûrgût îro sewqî Wanê bê kirin. 

	 

	4 ROJNAMEGER HATIBÛN GIRTIN

	 

	Eskeran di operasyona 11’ê Îlonê de li navçeya Şaxê ya Wanê Osman Şiban û Servet Tûrgût binçavkiribûn û ew ji helîkopterê avêtibûn. Nûçegihanên Ajansa Mezopotamyayê (MA) Adnan Bîlen, Cemîl Ûgûr nûçegihana Jinnewsê Şehrîban Abî û rojnameger Nazan Sala ji ber ku belgeyên ji helîkopterê avêtina Osman Şîban û Servet Tûrgût ê jiyana xwe ji dest da derxistin holê, di 6’ê cotmehê de hatibûn binçavkirin. Her çar rojnameger di 9’ê cotmehê de derxistin dadgehê, dadgehê jî bi hinceta “li dijî dewletê nûçeyên civakî çêkirinê” her çar rojnameger girtin. Piştî ku polîsan rojnameger binçavkiribûn, ser buroya me ya Ajansa Wanê de girtibûn û dest danîbûn ser kompîtûr, hard disk û ekîpmanên nûçeyan.