Parlamentoya Iraqê sûcên DAIŞ`ê yên li dijî êzidiyan weke  qirkirin qebûl kir 

2021-03-02 15:18:24


	NAVENDA NÛÇEYAN – Parlamentoya Iraqê, sûcên DAIŞ`ê yên li dijî jinan û zarokên êzidî û kêmneteweyên olî weke qirkirineke komî û sûcên li dijî mirovahiyê qebûl kir. 

	 

	Parlamentoya Iraqê, duh li hev civiya û pêşniyarqanûna ku ji bo qebûlkirina sûcên DAIŞ`ê yên li dijî jinan û zarokên êzidî û kêmneteweyên olî weke qirkirineke komî û sûcên li dijî mirovahiyê bê qebûlkirin, pêşkêşî wê hatibû kirin, qebûl kir. Li gorî qanûnê; wê tazmînat ji jinên ku ketine destê DAIŞ’ê û hatine rizgakirin re bê dayîn. Serokkomarê Iraqê Berhem Salih û Serokê Herêma Kurdistanê Nêçîrvan Barzanî, têkildarî qebûlkirina pêşniyarqanûnê daxuyanî dan û kêfxweşiya xwe ya ji bo anîn ziman. 

	 

	Berhem Salih, li ser hesabê xwe yê twîtterê daxuyand ku erêkirina parlamentoyê ji bo jinên êzidî yên qurbanên hovîtiya sûcên DAIŞ`ê serkeftinek e û wiha got: “Divê xebatên ji bo naskirina çarenûsa windahiyan û însafkirina qurbaniyan berdewam bikin û hesab ji sûcdaran were xwestin.”

	 

	Nêçîrvan Barzanî, ji bo qebûlkirina pêşniyarqanûnê spasiya hemû komên partiyên siyasî yên Meclisa Iraqê kir û diyar kir ku qebûlkirina pêşniyarqanûnê gaveke girîng e û ji bo razandina tazmînatê ya ji êzidiyan re û parastina jiyana wan destpêkeke.