Ji Ewropayê bertek: Girtina HDP’ê gava dawî ya diçe dîktatoriyê ye

2021-03-18 16:59:38


	 

	ENQERE - Parlamenterên PE'yê vekirina doza girtina HDP’ê û xistina parlamenteriya Omer Farûk Gergerlîoglû şermezar kirin û wiha gotin: “Erdogan, dixwaze partiyeke ku bi milyonan mirov deng didinê qedexe bike."

	 

	Koma Dostên Kurdan a Parlementoya Ewropayê (PE) û Koma Çep a Parlementoya Ewropayê, têkildarî vekirina doza  girtina HDP’ê û xistina parlamenteriya Omer Farûk Gergerlîoglû daxuyanî dan. Daxuyaniya hevpar a Hevserokên Koma Çep a Parlementoya Ewropayê (GUE/NGL) Manon Aubry û Martîn Schirdewan û Serokê Koma Çep a Yekgirtiya Ewropa ya Meclîsa Parlamenteran a Konseya Ewropa (UEL) Tiny Kox wiha ye: “Em weke endamên Meclîsa Parlementerên Konseya Ewropa û endamên Parlamentoya Ewropa, destnedayîna parlementerên muxalefetê û hewldana girtina partiya sêyemîn a parlamentoya Tirkiyeyê HDP’ê ya meqamên Tirk bi tundî şermezar dikin. Ev hewldan derveyî rêgezên demokrasiyê ku Tirkiyeyê qebûl kirine ye.”

	 

	SIYASETMEDAR AÎDÎ PARLAMENTOYÊ NE

	 

	Li gel hêj pêvajoya hiqûqî neqediyaye jî, xistina parlamenteriya Omer Farûk Gergerlîoglû ya bi fermana hikumetê fikaran zêde dike. Siyasetmedarên hatine hilbijartin aîdî parlamentoyê ne ne aîdî girtîgehê ne. Koma Dostên Kurdan a Parlementoya Ewropayê jî daxuyaniyek weşand û wiha got: “Em doza girtina HDP’ê bi tundî şermezar dikin. Erdogan dixwaze partiyeke ku bi milyonan mirov deng didine qedexe bike. Ev hem derveyî hiqûqê ye, hem jî ne demokratîk e. Ev binpêkirina mafên sivîl û siyasî ye. Ev gava dawî ya diçe dîktatoriyê ye û xelasbûna demokrasiyê ye. Divê Yekitiya Ewropayê li dijî vê kêfiyeta Erdogan a xeternak derkeve.”