Malbata Şenyaşar: Bila kes ji me helalkirinê naxwaze  

2021-05-16 10:57:58


	 

	RIHA – Malbata Şenyaşar, hesabê fermî yê Serokkomariyê etîket kir û ev peyam da: “Heta ku ev zilm bidome bila kes ji me helalkirinê nexwaze.” 

	 

	Nobeta bi daxwaza “edaletê” ya Emîne Şenyaşar ku 2 kurên wê û hevjînê wê ji aliyê xizm û parastvanên Parlamenterê AKP’ê yê Rihayê Îbrahîm Yildiz ve hatin kuştin û kurê wê Ferît Şenyaşar di roja 69’emîn de didome. Malbat Şenyaşar, li ber edliyaya Rihayê dest bi çalakiya xwe kiribû, lê niha ji ber qedexeya derketina derve ya pandemiyê çalakiya xwe niha li mala xwe ya li navçeya Pirsûsê didomîne. 

	 

	‘EM DIXWAZIN FAÎLAN LI DARAZÊ BIBÎNIN’

	 

	Malbata Şenyaşar, li ser hesabê xwe yê twîtterê hesabê Serokkomariyê etiket kir û ev peyam parve kir: “Weke mexdûrên komkujiyê, em dixwazin faîlan li darazê bibîbin. Lewre wê ev ji bo serî pê re derxistina êşa me bibe alîkarî. Lê ev jî ji destê me hat girtin. Zehmet tê lê divê em vana li her derê ragihînin. Heta ku ev zilm bidome bila kes ji me helalkirinê nexwaze.”