
‘Rakirina tecrîdê tê wateya azadbûna civakê’  

2021-06-02 09:32:46


	&nbsp;

	STENBOL - Hevserokê MATUHAY-DER’ê Nesîm Ozkan greva birçîbûnê ya li girtîgehan nirxand û destnîşan kir ku wextê Ocalan diaxive civak bêhnek fireh distîne û rakirina tecrîdê tê wateya azadbûna civakê.&nbsp;

	&nbsp;

	Rêberê PKK’ê Abdullah Ocalan li Girtîgeha Îmraliyê ya Tîpa F 22 sal in tê tecrîdkirin. Li girtîgehan ji bo rakirina tecrîdê û bidawîkirina binpêkirinên mafan ên li girtîgehan girtî ji 27’ê Mijdara 2020’an ve di greva birçîbûnê ya bêdawî û bidorveger de ne. Çalakî bi koma 38’emîn û di roja 188’emîn de berdewam dike.&nbsp;

	&nbsp;

	Hevserokê Komeleya Piştevanî û Alîkariya bi Malbatên Girtî û Hikumxwaran re (MATUHAY-DER) Nesîm Ozkan greva birçîbûnê ya li dijî tecrîd û binpêkirinên mafan ji ajansa me re nirxand.&nbsp;

	&nbsp;

	‘OCALAN DIKE KU BÊHNA XELKÊ DERKEVE’&nbsp;

	&nbsp;

	Ozkan bi bîr xist ku tecrîd sûcê mirovahiyê ye û tecrîda di şexsê Ocalan de li gelê kurd û netewên din tê sepandin. Ozkan diyar kir ku Ocalan di tezên xwe de hem ji bo Kurdistanê û hem jî ji bo Rojhilata Navîn rêyên çareseriyê yên girîng pêşkêş dike û got: “Lewma dixwazin têkiliya Ocalan û civakê ji hev qût bikin. Naxwazin fikrên wî belav bibin. Pêşî lê digirin. Îqtidar û derdora xwe ji bo berjwendiyên xwe tecrîdê kûr dikin. Bi pêşengiya Ocalan di salên 2013-2015’an de ji ber pêvajoya çareseriyê hebû xelkê li Tirkiyê bêhnek fireh digirt. Di demek kin de nirxên demokratîk bilind bûn. Carek din polîtîkaya tecrîdê xistin dewrê û ji sala 2015’an ve Tirkiye ketiye nava krîzên pir alî.”&nbsp;

	&nbsp;

	‘DIVÊ DAXWAZ WERIN QEBÛLKIRIN’&nbsp;

	&nbsp;

	Ozkan bi bîr xist ku greva birçîbûnê ya di sala 2012’an de ku 67 roj berdewam kir pêvajoya çareseriyê bixwe re anî û greva birçîbûnê ya bi pêşengiya Leyla Guven a di sala 2019’an de 200 roj dewam kir jî kir ku li gel Ocalan hevdîtin pêk were û ev her du pêvajo jî bûn sedema ku hinek deriyê çareseriyê were vekirin.&nbsp;

	&nbsp;

	Ozkan destnîşan kir ku divê dewlet ji bo daxwazên girtiyan û gelê kurd gavan biavêje û got: “Çalakvan yanî girtî di daxwaz û çalakiya xwe de bi israr in. Dixwazin tecrîd rabe, bi birêz Ocalan re dîsa hevdîtin werin kirin. Ev jî daxwazên hiqûqî ne.”&nbsp;

	&nbsp;

	TENDURISTIYA GIRTIYAN NEBAŞ DIBE&nbsp;

	&nbsp;

	Ozkan anî ziman ku li gorî rapora Şandeya Şopandina Greva Birçîbûnê ya Herêma Marmarayê têkildarî greva birçîbûnê amade kiriye 600 girtî ketine greva birçîbûnê û tenduristiya girtiyan her ku diçe nebaş dibe û ew girtiyên di sala 2012, 2018-2019’an dîsa dikevin greva birçîbûnê û ev jî ji bo tenduristiya wan xetereyê bi xwe re tîne û xwest daxwazên girtiyan werin qebûlkirin. Ozkan da zanîn ku her ku diçin li girtîgehan binpêkirinên mafan ên girtiyan jî tên desteserkirin û ev binpêkirin kûr dibin û girtî bi zextan re rûbirû ne.&nbsp;

	&nbsp;

	‘RAKIRINA TECRÎDÊ AZADBÛNA CIVAKÊ YE’&nbsp;

	&nbsp;

	Ozkan destnîşan kir ku divê rêxistinên civakî yên sivîl û gel deng bide qîrîna ji girtîgehan olan dide û got: “Rakirina tecrîdê tê wateya azadbûna civakê. Xwedî derketina li girtiyan, xwedî derketina li tevahiya civakê ye. Ji ber vê yekê em dixwazin her kes li gorî xwe tiştek bike.”&nbsp;

	&nbsp;

	&nbsp;