Malbat, wasî û parêzer ji bo biçin Îmraliyê serlêdan kirin 

2021-09-03 14:59:44


	STENBOL - Malbat, wasî û parêzerên Rêberên PKK'ê Abdullah Ocalan ê li Girtîgeha Îmraliyê dibin şert û mercên tecrîdek girankirî de ye, ji bo hevdîtina roja duşemê serî li Serdozgeriya Komarê ya Bûrsayê dan.

	 

	Ji parêzerên Rêberê PKK’ê Abdullah Ocalan ê 22 sal in li Girtîgeha Tîpa F a Ewlekariya Bilind a Îmraliyê di bin tecrîdeke giran de ye, Raziye Ozturk, Faîk Ozgur Erol, Rêzan Sarica û Cengîz Yureklî,  ji bo bi miwekîlên xwe re roja duşemê hevdîtinê bikin, serî li Serdozgeriya Komarê ya Bûrsayê dan. 

	 

	Birayê Ocalan, Mehmet Ocalan û wasiyê wî Mazlûm Dînç û birayê girtî Omer Hayrî Konar, Alî Konar, birayê Hamîlî Yildirim, Polat Yildirim û xwişka Veysî Aktaş, Melîhe Çetîn jî bi rêya parêzeran ji bo roja duşemê serî li Serdozgeriya Komarê ya Bûrsayê dan. 

	 

	NE ERÊNÎ NE NEYÎNÎ BERSIV NADIN

	 

	Di 23’ê Îlona 2020'an de, bi hinceta “Nexşerêya" Ocalan ku di sala 2009’an de weke pêveka parastina xwe ji Dadgeha Mafê Mirovan a Ewropayê (DMME) re şand, ji bo 6 mehan biryara qedexeya parêzeran dabûn Ocalan û 3 girtiyên gel wî. Ligel ku qedexeya hevdîtinê di 23’yê Adarê de qediya jî, ji serlêdanên parêzeran re ne erênî ne neyînî bersiv nayê dayîn. Dîsa bi serlêdana parêzeran a di Çileya 2021'an re, derketibû holê ku cezayek dîsîplînê yê nû dane Ocalan. 

	 

	Ji parêzerên Ocalan Rezan Sarica û Newroz Ûysal, piştî 8 salan di 2-22’ê Gulan, 12-18’ê Hezîran û 7’ Tebaxa 2019’an de hevdîtin bi muwekîlên xwe re kiribûn.

	 

	HEVDÎTIN DI NIVÎ DE BIRÎ BÛN 

	 

	Herî dawî ji ber îdiayên li ser hesabên medya civakî yên derbarê Ocalan de fikarên raya giştî mezin bûbûn û di 25’ê Adarê de birayê Ocalan Mehmet Ocalan pê re bi telefonê axivî bû. Lê Mehmet Ocalan ragihandibû ku hevdîtina telefonê di nivî de hatiye birîn. Ocalan ku 22 sal in li Girtîgeha Îmraliyê ya Ewlehiya Bilind a Tîpa F di bin tecrîdeke girankirî de girtî ye cara ewil di 27’ê Nîsana 2020’an bi telefonê bi birayê xwe Mehmet Ocalan re axivîbû.