Seroka Koma Goranê: Divê Rêveberiya Xweser bê naskirin 

2021-11-03 12:52:02


	 

	NAVENDA NÛÇEYAN - Seroka Koma Goranê ya Parlamentoya Herêma Kurdistanê Gulistan Seîd, diyar kir ku divê parlamento Rêveberiya Xweser a Bakur û Rojhilatê Sûriyeyê bi awayekî fermî nas bike. 

	 

	Parlamentoya Katalonyayê, di 20'ê cotmehê de bi piraniya dengan bi awayekî fermî Rêveberiya Xweser a Bakur û Rojhilatê Sûriyeyê nas kir. Seroka Koma Goranê ya Parlamentoya Herêma Kurdistanê Gulistan Seîd, têkildarî mijarê  ji RojNewsê re axivî û xwest ku Parlamentoya Herêma Kurdistanê jî heman gavî bavêje û Rêveberiya Xweser a Bakur û Rojhilatê Sûriyeyê nas bike. 

	 

	Gulistan Seîd, têkildarî mijarê ev tişt got: "Hemû pileyên îdarî di xwerêveberiya Bakur û Rojhilatê Sûriyeyê de hene. Di salên borî me dît ku Rêveberiya Xweser dikare karê rêveberinê bi serkeftî bide meşandin. Rêveberiya Xweser dikare binesaziya aborî rêxistin bike û rewşa jiyana xelkê baştir bike û mafê hemû pêkhateyên cuda misoger bike. Divê Kurd ji bo parçeyên din timî hevkar û hemaheng bin. Bi taybet divê başûrê Kurdistanê piştgiriya beşên din ên Kurdistanê bike. Weke dema şerê Kobanê çawa ku Parlamenotya Herêma Kurdistanê biryar da pêşmerge bişîne, niha jî erka Parlamentoya Kurdistanêye ku  Rêveberiya Xweser nas bike.”