
Dayika 55 salî ji bo azadî û aştiyê têdikoşe 

2021-12-21 09:09:01


	ŞIRNEX - Emîne Oruç a ku ala têkoşîna hevjînê xwe yê rêveberê HDP’ê bû û wefat kir dewr girt, li gel zext û êrişên li ser HDP’ê û dayikan jî berdewam dike jî xwe tevli xebatan kiriye û dibêje wê ji bo azadî û aştiyê têbikoşe.&nbsp;

	Li navçeya Sîlopiya ya Şirnexê Rêveberê Rêxistina Partiya Demokratîk a Gelan (HDP) yê Navçeyê Abdullah Oruç (58) bi salan bi awayeke çalak di nav xebatên partiyê de cih girt û emrê xwe di ber tekoşînê gelê kurd de da. Oruç, di temenê xwe yê mezin de şev û roja xwe kir yek û xebatên xwe dan meşandin. Oruç, ku ji aliyê derdorê ve jî pir dihat hezkirin di nava hevalên xwe de xebatkarê herî temen mezin bû. Oruç ê ku heta emrê xwe yê dawiyê ji bo pêkanîna edeletê û aştiyeke mayinde tekoşiya, di 12’ê adara 2020'an de krîza dil derbas kir û jiyana xwe ji dest da. &nbsp;Piştî mirina Oruç, hevjîna wî Emîne Oruç a 55 salî ala wî ya tekoşînê hilgirt ser milê xwe û tevlî xebatên partiyê bû. Emîne Oruç, ku niha di nav xebatan de cih digire pêşengiya tekoşîna Dayikên Aştiyê dike.&nbsp;

	&nbsp;

	'GIREDAYÎ DOZA XWE BÛ'&nbsp;

	&nbsp;

	Emîne Oruç, diyar kir ku hevjînê wê ji aliyê her kesî ve dihat hez kirin û wiha vegot: "Hevalê Evdî hevalê min ê dozê bû. Miroveke gelek bêhn fireh bû û sebra wî gelek hebû. Qedrê mirovan gelek digirt. Her tim bi ken û moral bû. Ew hevalê hevalê xwe bû. Hevalê cîranê xwe, zarokên xwe û her kesîkî bû. Ji bo ku mirovan aciz neke çi ji destê wî dihat dikir. Şev û roj di nav xebatên partiyê de bû. Ji xizmeta gel re her tim amade bû. Her tim digot, 'Ez deyndarê gelê xwe me. Wisa bizanibin ku ez tune me. Ez ê li pey doza xwe bim’. Roja ku ew tevlî partiyê bû, heta ku jiyana xwe ji dest da girêdayî doza xwe bû.”

	&nbsp;

	ALA ÊKOŞÎNA HEVJÎNÊ XWE RAKIRIYE&nbsp;

	&nbsp;

	Oruç da zanîn ku ew ê heta dawiya emrê xwe ji bo têkoşîna aştî, azadî û demokrasiyê bixebite û wê nehêle ala têkoşîna hevjînê wê bikeve. Orûç diyar kir ku roja ku hevjînê wê jiyana xwe ji dest dide soz dide ku ew ê ala tekoşîna wî rake û ji niha şûn ve tişta bikeve ser milê wê dê bike. Oruç destnîşan kir ku niha ala têkoşîna hevjînê xwe rakiriye û tevî hemû zext û zordariya li ser gelê kurd, partiya wan û dayikan jî xwedî li nirx û partiya xwe derdikevin. Oruç da zanîn ku ew niha di xebatên Dayikên Aştiyê de jî cih digire û xest her kes xwedî li doza xwe û partiya xwe derkeve da ku zextên li ser partiya wan pûç bibin.&nbsp;

	&nbsp;