
Li Girtîgeha Amedê li dijî binpêkirinên mafan greva birçîbûnê     

2022-04-14 18:17:51


	AMED - Girtiyên di Girtîgeha Amedê ya Jimare 1'ê de li dijî îşkence û binpêkirinên mafan ji bo 3 rojan greva birçîbûnê dan destpêkirin û bang li rêxistinên civaka sivîl kirin.&nbsp;

	
		Girtiyên siyasî yên di Girtîgeha Amedê ya Jimare 1'ê de li dijî binpêkirinên mafan dest bi greva birçîbûnê kirin. Hat ragihandin ku çalakiya greva birçîbûnê îro dest pê kiriye û dê 3 rojan bidome.&nbsp;
	
		&nbsp;
	
		Beran Eman a 23 salî ku li navçeya Nisêbîn a Mêrdînê di dema qedexeya derketina derve ya di 14'ê Adara 2016'an de hat îlankirin de hatiye girtin û 35 sal û 10 meh ceza lê hatiye birîn, telefonî malbata xwe kir.&nbsp;
	
		&nbsp;
	
		Eman, diyar kir ku di demên dawî de îşkence pir zêde bûye û danê sibehê gardiyan avêtine ser qawîşên wan û belesebeb bela xwe di girtiyan dane û gef li wan xwarine û gotine "Hûn ê hêza dewletê bibînin." Eman, bibîr xist ku di demên dawî de li girtîgehê nêzîkatiyên kêfî yên gardiyanan pir zêde bûne û li Bloka C'yê bi dehan gardiyan girtî Umît Ozkan, Mehmet Kasim Aslan û Dogan Ozbahçeçî ji qawîşê derxistine û birine cihekî kamera lê tune ne û li wir li wan xistine.&nbsp;
	
		&nbsp;
	
		Eman, ragihand ku girtiyan rapora derbkirinê girtine û paşê girtiyan birine qawîşeke din. Eman, bilêv kir ku piştî pêkanînên îro yên danê sibehê li Girtîgeha Jimare 1'ê ji bo sê rojan greva birçîbûnê hatiye destpêkirin û ger îşkence bi dawî nebin dê greva xwe veguherînin greva bêdem.&nbsp;
	
		&nbsp;
	
		Eman ji bo tespîtkirina pêkanînên li girtîgehê bang li Baroya Amedê, Komeleya Hiqûqnasan a Ji Bo Azadiyê (OHD) û Komeleya Mafên Mirovan (ÎHD) kir.&nbsp;


	&nbsp;