
Ciwanan ji ber Roja Dayikan serdana Emîne Şenyaşar kirin

2022-05-08 14:41:09


	&nbsp;

	RIHA - Ciwanên HDP’î û xwendekarên Zanîngeha Harranê, serdana Emîne Şenyaşar a têkoşîna xwe ya edaletê didomîne kirin û Roja wê ya Dayikan pîroz kirin.&nbsp;

	&nbsp;

	Çalakiya Nobeta Edaletê ya malbata Şenyaşar a li pêş Edliyeya Rihayê di roja 426’emîn de berdewam dike. Ji ber dawiya hefteyê ye û edliye girtî ye malbata çalakiya xwe ya nobetê li mala xwe didomîne. Endamên Meclîsa Ciwanan a Partiya Demokratîk a Gelan (HDP) û xwendekarên Zanîngeha Harran bi boneya Roja Dayikan serdana malbatê kirin. Ciwanan bi kulîlkan Roja Dayikan li Emîne Şenyaşar pîroz kirin.&nbsp;

	&nbsp;

	BANG LI CIWANAN KIR

	&nbsp;

	Endamên Meclîsa Ciwanên HDP’ê yê Rihayê Omer Altûn ê di serdanê de axivî, di kesayeta dayika Emîne Şenyaşar de Roja Dayikan li hemû dayikan pîroz kir û wiha got: “Em weke ciwanên kurd bi çavên xwe dibin şahidê berxwedana destanî ya malbata Şenyaşar a 426 roj in dîwarên avahiya Edliyeya Rihayê dihejînin. Berxwedana malbata Şenyaşar a ji aliyê çapemeniya cihanê ve jî tê şopandin îro mixabin ji aliyê medyaya alîgir ve nayê dîtin û tê paşguhkirin. Em weke endamên Meclîsa Ciwanên HDP’ê û xwendekarên Zanîngeha Harranê careke din jî diyar dikin ku em ê bibin dengê vê berxwedanê. Ne tenê ciwanên kurd em bang li hemû ciwanan dikin ku bibin dengê vê berxwedanê.”

	&nbsp;

	‘LI DIJÎ BÊHIQÛQIYÊ SERÎ HILDIDE’

	&nbsp;

	Malbatê li ser hesaba xwe ya medyaya dîjîtal bi etîketa Roja Dayikan ev peyam parve kir: “Îro roja dayikan e. Dayikeke ku hatiye qetilkirin û ji bo kurê xwe yê girtî li pêş ediyeyê li dijî bêhiqûqiyê serî hildide heye. Roja Dayikan a hemû dayikên li dijî zilmê bêdeng nemînin pîroz be.”

	&nbsp;