
Ji bo nîşankera ku wêneyê Demîrtaş li ser bû gotin ‘bo ewlehiya girtîgehê xetere ye’  

2022-06-14 11:45:53


	ENQERE - Nîşankera ku wêneyê Hevserokê Giştî yê HDP’ê yê berê Selahattîn Demîrtaş li ser bû, li Girtîgeha Kayseriyê ji ewil weke hinceta “propagandaya rêxistinê” hate dîtin û piştre jî bi îdiaya “gefê li ewlehiya girtîgehê dixwe” nedan girtî Metîn Karadogan.&nbsp;

	&nbsp;

	Girtiyê bi navê Metîn Karadogan li Girtîgeha Tîpa T a Hejmar 2 ya Bunyan a Kayseriyê tê ragirtin. Bi hinceta ku wêneyê Hevserokê Giştî yê Partiya Demokratîk a Gelan (HDP) ê berê Selahattîn Demîrtaş li ser heye, nîşankera pirtûkê nedanê.&nbsp;

	&nbsp;

	Li ser vê yekê Karadogan serî li Lijneya Rêveberî û Çavderiyê ya Girtîgeha Tîpa T a Hejmar 2 ya Girtîgeha Kayseriyê da. Lijneya Rêveberî û Çavdêriyê di 16’ê adara 2022’yan de biryar da ku ev nîşanker neyê dayîn. Lijneyê da zanîn ku bi kar anîna nîşankerê li dijî zagon û qanûnan nîne û ev tespît kir: “Lê belê bi vê yekê dixwazin rêxistina terorê di bin hiş de bicih bikin û propagandaya bîrdoziyê ya rêxistinê bikin. Li ser vê yekê jî wisa guncav hat dîtin ku ev nîşankera pirtûkê neyê dayîn.”

	&nbsp;

	LI DADGERIYA ÎNFAZÊ ÎTÎRAZ KIR

	&nbsp;

	Karadogan mijara behsa xeberê bir Dadgeriya Înfazê ya Kayseriyê û got; “4 pirtûkên Demîrtaş hene, bi biryara DMME’yê re Tirkiye mehkûmû tazmînatê hatiye kirin û siyasetmedar e ku li girtîgehê bûbû namzetê serokkomariyê. Lewma ev îdiayên tên kirin, bêbingeh in.” Karadogan xwest ku nîşankera wî ya pirtûkê were dayîn.

	&nbsp;

	JI BO EWLEHIYA CAN GEF E

	&nbsp;

	2’yemîn Dadgeriya Înfazê ya Kayseriyê jî heq da Serokatiya Lijneya Rêveberî û Çavdêriyê ya Girtîgeha Kayseriyê û îtîraza Karadogan red kir. Dadgeriyê di hinceta xwe de wiha got: “Li ser nîşankerê nivîsa ‘Selahattîn Demîrtaş’ heye û Demîrtaş di demên berê de serokatiya partiyeke siyasî kiriye. Tu guman nîne ku kesayetekî siyasî ye. Dibe ku di nava qawîşê de hem alîgir û hem jî dijberên wî hebin. Lewma dibe ku ev rewş rê li ber bûyerên neyînî veke. Ev rewş dê xetereyê li ser ewlehiya saziyê çêbike. Lewma jî îtîraz hatiye redkirin.”&nbsp;

	&nbsp;

	Lê belê Karadogan dev ji rêyên hiqûqî berneda û mijar bir Dadgeha Cezayên Giran a Kayseriyê. 1’emîn Dadgeha Cezayên Giran a Kayseriyê jî di 31’ê adarê de biryar da û got ku biryara 2’yemîn Dadgeriya Înfazê ya Kayseriyê di cih de ye û îtîraz red kir.&nbsp;

	&nbsp;

	Li ser vê yekê jî ji bo Dadgeha Qanûna Bingehîn serlêdan kir.&nbsp;

	&nbsp;

	MA / Bêrîvan Altan

	&nbsp;