
Navenda Kurdî ya Lêkolînan dest bi weşana kurdî kir 

2022-08-02 14:53:18


	&nbsp;

	NAVENDA NÛÇEYAN - Navenda Kurdî ya Lêkolînan dest bi weşana beşa kurdî jî kir û dê ji niha şûn ve xebatên xwe yê lêkolînê bi zimanê kurdî û erebî bi rê ve bibe.&nbsp;

	&nbsp;

	Malpera Navenda Kurdî ya Lêkolînan (NKL) ku li rojavayê Kurdistanê (Bakur û Rojhilatê Sûriyê) xebatên xwe yên akademîk û zanistî bi rê ve dibe, dest bi weşana beşa kurdî jî kir. Beriya niha tenê beşa bi erebî ya malpera Lêkolînê hebû. Niha malper derbasî weşana du zimanî bûye.&nbsp;

	&nbsp;

	Rêveberiya NKL’ê derbarê damezrandin, armanc û xebatên xwe de wiha dibêje:&nbsp;

	&nbsp;

	“Wek pênasîn, em dikarin bibêjin ku Navenda Kurdî ya Lêkolînan (NKL) di sala 2014'an de hatiye damezirandin. Ew mîna saziyek serbixwe ya ji bo lêkolînkirina rewşên/aliyên siyasî, aborî, civakî û stratîjî li Rojavayê Kurdistanê, Rojhilata Navîn û tevahiya cîhanê, ava bûye.

	&nbsp;

	NLK heta niha bi zimanê erebî berhemên xwe belav dikir. Wê bi sedan Lêkolîn, nêrîn, werger û gotarên di hemû beşên zanistê de pêşkêşî xwendevanan kiriye. Wek nasname, NLK xwe bi saziyek kurdî &nbsp;dizane, lê ew zanistek bêalî û şîroveyek rasteqîn ya rewşê, analîzkirina reyalîta civakê wek ku ew heye, armanc digire. Ew aliyên neronîkirî û sansorkirî yên mijarên girêdayî Kurdan, Rojavayê Kurdistanê, Sûriyê û Rojhilata Navîn dide pêş. Her wiha, li ser astek global jî lêkloînan dike. Ew mijarên mîna globalîzim, şerên herêmî, hilbirîn û pêşbaziya pêşxistina çekan û islama siyasî jî dişopîne.

	&nbsp;

	NLK hewl dide diyalogekê di navbera Kurd û Ereban de durust bike û vê diyalogê dewrî hevdûnaskirinekê ku li ser bingehek zanistî ava dibe, bike. Di vî karê zanistî de cihê rexneyê û nêrîna din jî heye. Armanc ew e, ku bi riya kar û barê NLK civak bi awayekî zanistî ya profesyonel were agahdarkirin û ew karibe zemîna xwenûkirin û xweguhertinê deyne. Ev civak rastiya rewşê û guhertinên herêmî û cihanî nas bike. Ew nêzîkî hev bibe û li ser bingeha jiyanek hevbeş, cihêreng û demokrat, xwe bi hev bide qebûlkirin.

	&nbsp;

	NLK dixwaze taybetmendiyên dîrokî, civakî, çandî û siyasî yên her pêkhatiyekê derxe holê û derfetê bide wê yekê, ku ev pêkhatî were naskirin û mîna dewlmendiyekê bête diyarkirin. Her wiha NLK dixwaze cih û rola jinê jî analîze bike. Ew deriyê xwe ji bo hemû lêkolîn û şîroveyên derbarê jinê de vedike.

	&nbsp;

	Ji sala 2014`an de û vir ve, NLK bi sedan lêkolîn û şîroveyên dirêj belav kiriye. Ew Lêkolîn ji aliyê gelek zanîngeh, dezgeh û navendên lêkolînan mîna jêder hatine bikaranîn. Her wiha bi dehan ji têzeyên doktora û masterê li gelek zanîngehên welatên ereb, Ewropa û DYA yê, lêkolîn û madeyên zanistî yên ku NLK belav kirine, wek jêder bikar anîne.

	&nbsp;

	NLK cihekî xwe yê taybet di nava dezgeh û navendên lêkolînan girtî ye. Ew niha bûye jêderekî sereke ya wergirtina agahdarî û şîroveyên zanistî yên derbarê herêma Rojavayê Kurdistanê û tevahiya heremê de. Lêkolîner, xwendevanên beşên bilind ên siyaset û civakê, êdî NLK dişopînin û analîz û lêkolînên wê ji bo xwe dikin çavkanî û jêdera pêbawer.

	&nbsp;

	Ev wek pênasînek kurt ya karê NLK ji sala 2014'an ve (beşê erebî), lê em ê niha dest bi weşana beşê kurdî bikin. Êdî NLK dê bi zimanê kurdî lêkolîn, şîrove, nirxandin û nêrînên di hemû beşên zanyariyê de belav bike. NLK ya kurdî dê xwedî armancek sereke be, ew jî ji bo xwendevanên kurd, ragihandina wêneyekî geştî û rasteqîne ji rewşa herêma Rojavayê Kurdistanê û tevahiya Rojhilata Navîn re.

	&nbsp;

	NLK a kurdî dê ne agahî û nûçeyên lezok û kurt bide, lê wê lêkolînên bi dehên rûpel, şîroveyên dirêj yên taybet, werger û nêrînên ku xebatkar û nivîskarên wê amede dikin, ji bo Kurdan û hemû xwendevanên bi zimanê kurdî, belav bike.

	&nbsp;

	Ev demeke ku em li ser amedekirina beşê kurdî yê NLKê radwestin. Me xwest ku em li gorî navê xwe bin û bi hijmarek mezin û dewlemend ya lêkolîn û şîroveyan werin qada belavkirina kurdî. Em dixwazin rewşa li welatê xwe bi zimanê kurdî, bi formek akadîmî ya bilind, vebêjin û bi xwendevanên kurd re parve bikin.

	&nbsp;

	Li gel lêkolînên taybet bi beşê kurdî, dê liva wergerê ji beşên erebî û ingelîzî aktîv be. Ew lêkolîn û şîroveyên ku bi taybet ji bo NLK bi zimanên erebî ingelîzî tên amedekirin, dê bo beşê kurdî werin wergerandin. Ev kedek mezin û karekî hayedar û profesyonel dixwaze.

	&nbsp;

	Em hêvî dikin û wek armanc li pêşiya xwe dibînin, ku NLK di cîhana peyva kurdî de deriyekî zanistê veke û ji bo hemû akadîmîkar, rojnamevan û xwendevanên peyva kurdî bibe alava pêbawer ya şopandin û zanistwergirtinê.”

	&nbsp;

	Lînka malpera NKL’ê wiha ye: https://nlka.net/ku/

	&nbsp;