
Apê Mûsa li kolana lê hatiye qetilkirin hat bibîranîn: Em roj bi roj mezintir dibin

2022-09-20 11:34:11


	AMED –&nbsp;Zanyarê kurd Mûsa Anter di 30’emîn salvegera qetilkirina xwe de li kolana lê hatiye qetilkirin hat bibîranîn. Rojnameger Huseyîn Aykol got: “Em roj bi roj mezintir dibin.”&nbsp;

	&nbsp;

	
	&nbsp;

	
		Komeleya Rojnamegeran a Dîcle Firatê (DFG) ji bo bîranîna Apê Mûsa (Anter) ku di 20’ê îlona sala 1992’yan de li Semta Seyrantepe ya Amedê hatibû qetilkirin, merasîma bîranînê li dar xist. Merasîma bîranînê li Kolana 442’yan a Taxa Cumhuriyetê ya Seyrantepe ya Amedê hat lidarxistin. Di bîranînê de kurê Mûsa Anter, Dîcle Anter, DFG, Platforma Rojnamegerên Jin a Mezopotamyayê (MKGP), Partiya Herêmên Demokratîk (DBP), Partiya Demokratîk a Gelan (HDP), parlamenter Îmam Taşçier û Gulistan Kiliç Koçyîgît, xizmên girtiyên nexweş, Komeleya Piştevaniya bi Malbatên Girtî û Hikûmxwaran re (TUHAY-DER), Hewldana 78’an a Amedê, rojnameger Huseyîn Aykol û gelek kesên din amade bûn.&nbsp;
	
		&nbsp;
	
		PEYREWÊN APÊ MÛSA&nbsp;
	
		&nbsp;
	
		Di bîranînê de Hevseroka DFG’ê Dîcle Muftuoglû diyar kir ku zanyarê gelê kurd, mamosteyê rojnamegerên kurd Apê Mûsa 30 sal berê li vê kolanê hatiye qetilkirin û wiha domand: “Guleya li wî hatiye xistin, li zimanê gelê kurd, li lêgerîna heqîqetê hat xistin. Xwestin bi qetilkirina Apê Mûsa re gelê kurd bêdeng bikin û bêpênûs bihêlin. Apê me yê Mûsa li vê kolanê hate qetilkirin û pênûsa wî di nava xwînê de ma. Lê belê peyrewên wî hîn niha jî rastiyan dinivîsin. Cengîz Altûnan, Gurbeteliyan, Ferhat Tepeyan, Denîz Firat û Nûjiyan Erhanan ew pênûs dewr girtin û ji me re hiştin. 16 kedkarên çapemeniya azad û peyrewên Apê Mûsa ji ber ku heqîqet bi gel re parve dikirin, di 16’ê hezîranê de hatin girtin. Em li vir dîsa dibêjin; ev kesên ku dema hewl didan rastiyê bigihînin gel û di vê oxirê de hatine qetilkirin, rûmeta me ne. Em li cihê Apê Mûsa lê hatiye qetilkirin dîsa bang dikin; em pênûsa Apê Mûsa ne. Em generalên wî yên biçûk in. Em peyrewên wî ne û dê dest ji têkoşîna heqîqetê bernedin.”&nbsp;
	
		&nbsp;
	
		ROJ BI ROJ MEZINTIR DIBIN’
	
		&nbsp;
	
		Rojnameger Huseyîn Aykol jî êrişên di demên berê de li dijî çapemeniya azad dihatin kirin bi bîr xist. Bi domdarî Aykol ev tişt anî ziman: “Girtin çêbûn lê me dîsa jî meşa xwe domand. Ez nehatime vê derê ku nefreta li dijî kujerên Apê Mûsa vebêjim. Ez hatim vê derê ku deynê xwe yê bo Apê Mûsa bidim. Ka te em çawa hiştibûn em wisa nînin. Ji wê rojê heta niha me nêzî 50 rojname derxistin, radyoyên me çêbûn. Televîzyonên me hene ku ji bo hemû cîhanê weşanê dikin. Her neteweyekî ajansa xwe heye. Em di vê oxirê de şehîd bûn, hatin girtin. Ajansên me jî mîna rojnameyan hatin girtin. Niha her ku em dijîn, dê tiştên gelê kurd jî dijî bikin nûçe. Em ê bi hemû cîhanê re parve bikin. Ev bû 33 sal ku ez li vê derê me. Ciwanên di emrê zarokê min, neviyê min de niha tev li çapemeniya azad bûne. Roj bi roj mezintir dibin.”&nbsp;
	
		&nbsp;
	
		'DÊ APÊ MÛSA HER HEBIN’
	
		&nbsp;
	
		Piştre jî Parlamenterê HDP’ê yê Amedê Îmam Taşçier axivî û wiha got: “Di dîrokê de gelek caran hewl dan ku gelê kurd tune bikin. Apê Mûsa got; ‘em vê qebûl nakin.’ Ji bo vê jî bo gelê kurd nivîs nivîsandin. Lewma di 70 saliya xwe de li kolanekê hat qetilkirin. Heta ku ev pergal wiha bidome, dê kesên weke Apê Mûsa jî her hebin. Dibe ku Apê Mûsa wê demê bi tenê bû lê niha bûne bi milyonan.”&nbsp;
	
		&nbsp;
	
		Piştî axaftinan, beşdaran dirûşma “Kesek nikare çapemeniya azad bêdeng bike” berz kirin û heta cihê Apê Mûsa lê hatiye qetilkirin meşiyan. Beşdaran, qurnefîl danîn cihê ku Apê Mûsa lê hatiye qetilkirin û bîranîn bi dawî bû.&nbsp;


	&nbsp;