
Girtî: Em bi pergaleke înfazê ya li tu derî nayê dîtin re rû bi rû ne 

2022-09-28 09:01:05


	&nbsp;

	&nbsp;

	ÎZMÎR - Girtiyên ku têkildarî binpêkirinên mafan name nivîsandin û wiha gotin: "Em di hundir de bi pirsgirêk û bêhiqûqîtiyên mezin re rû bi rû dimînin. Em bi pergaleke înfazê ya li tu devera cîhanê tune ye re rû bi rû ne."

	&nbsp;

	Girtiyên li Girtîgeha Tîpa T a Hejmar 2 ya Şakran a Îzmîrê têkildarî binpêkirinên mafan ên li girtîgehê nameyek şandin. Girtiyan di nameya xwe de sedemên polîtîkayên çewisîner ên li Tirkiyeyê nirxandin û xwestin her kes piştgiriya nobetên edaletê yên li Îzmîr, Stenbol, Amed û Wanê bike.&nbsp;

	&nbsp;

	PIRSGIRÊKÊN CIVAKÎ

	&nbsp;

	Girtiyan diyar kirine ku di encama polîtîkayên desthilatdariya siyasî yên li Tirkiyeyê de alozî û qeyraneke &nbsp;mezin rû daye û gotine ku her diçe rêgezên demokratîk û hiqûqî ji holê tên rakirin û berberîbûn tê afirandin. Girtiyan di nameya xwe de bilêv kiriye ku li welêt krîzeke mezin a aborî heye û ji ber vê krîza aborî pirsgirêkên civakî jî roj bi roj zêde dibin.

	&nbsp;

	'DENGÊ ME NAYÊ BIHÎSTIN'

	&nbsp;

	Girtiyan di berdewamiya nameya xwe de destnîşan kirine ku desthilat hemû kesên derveyî xwe wekî dijmin dibîne û bi hiqûqa dijminatiyê nêzî wan dibe û wiha gotine: "Hemû kesên doza mafên xwe dikin û ne li ser xeta wan in digirin an jî bi darê zorê ditepisînin. Ji ber vê yekê ewlehiya jiyanî ya derdorên civakî tune ye. Dejenerebûn û gendeliya rû dide û têkiliyên bi mafyayan re bi mikurhatinan tên eşkerekirin. Ev tişt bi awayekî zêdetir xwe li girtîgehan didin der. Em girtiyên siyasî, di hundir de bi pirsgirêk û bêhiqûqiyên gelekî mezin re rû bi rû dimînin. Mixabin em nikarin van pirsgirêk û derdên xwe ragihînin tu derî. m bi pergaleke înfazê ya li tu devera cîhanê tune ye re rû bi rû ne. Çendî cezayên me temam bûne jî em nayên berdan.&nbsp;

	&nbsp;

	BANGA JI BO NOBEDÊN EDALETÊ

	&nbsp;

	Lê mixabin nobeda edaletê ya ku di şexsê girtiyan de hemû civakê eleqedar dike, baş balê nakişîne û piştgiriya wê nayê kirin. Em girtiyên li Kampusa Şakranê, em difikirin ku hemû aliyên civakî piştgiriya nobetên edaletê bikin û wan berfirehtir bikin. Em girtiyên siyasî yên li hundir em piştgiriyê didin çalakiya nobeda edaletê ya ji aliyê malbatên me ve hatiye destpêkirin. Em bang li raya giştî ya demokratîk û hemû pêkhateyên civakî dikin ku piştgiriyê bidin vê çalakiya aştiyane."

	&nbsp;