
Rojnamevan Kadrî Bagdû hate bibîranîn 

2022-10-14 14:11:26


	&nbsp;

	EDENE - Rojnamevan Kadrî Bagdû yê li Edeneyê ji aliyê DAIŞ’ê ve hate qetilkirin, li ser gora xwe hate bibîranîn. &nbsp;

	&nbsp;

	Xebatkarê Rojnameya Azadiya Welat Kadrî Bagdû yê di 14’ê cotmeha 2014’an de dema rojname belav dikirin ji aliyê DAIŞ’iyan ve li Taxa Ova ya Semta Şakîrpaşa ya navçeya Seyhan a Edeneyê hate qetilkirin, li ser gora xwe ya li Goristana Kuçukoba hate bibîranîn. Malbata Bagdû, Komeleya Rojnamevanan a Dîcle Firatê (DFG), endam û rêveberên Platforma Rojnamevanên Jin a Mezopotamyayê (MKGP), Partiya Demokratîk a Gelan (HDP), Meclisa Dayikên Aştiyê, Partiya Herêmên Demokratîk (DBP), Komeleya Piştevanî û Alîkariyê ya bi Malbatên Kesên Xizmên xwe Windakirine re ya Akdenîzê (AYKAYDER), Komeleya Piştevanî û Alîkariyê ya bi Malbatên Girtî û Hikumxwaran re ya Akdenîz Edeneyê (AATUHAY-DER) û gelek kes beşdarî bîranînê bûn.&nbsp;

	&nbsp;

	‘TÊKOŞÎNA WAN RÊYA ME RONÎ DIKE’

	&nbsp;

	Beşdarvanan qurnefîl, rojnameyên Xwebûn û Yenî Yaşamê danîn ser gora Bagdû. Hevjîna Bagdû Şemsa Bagdû, daxwazên xwe yên edaletê dûbare kirin û xwestin ku kujer bên darizandin.&nbsp;

	&nbsp;

	Berdevka MKGP’ê Roza Metîna jî bi bîr xist ku faîlên Bagdû bên dîtin û cezakirin û wiha got: “Ev perçeyekî şerê taybet û polîtîkayên bêcezatiyê ne. Dosyaya Mûsa Anter kete ber demboriyê. Faîlên hevrêyê me Kadrî Bagdû jî nayên dîtin. Em ê li dijî vê têbikoşin. Em têkoşîna ku hevalê me di nîvî de hiştî bidomînin. Hişmendiya ku di sala 2014’an de hevrêyê me Bagdû qetil kir û hişmendiya li bajarê Silêmaniyê yê Herêma Kurdistana Federe Nagîhan Akarsel qetilkir eynî ne. Li Tirkiyeyê û Kurdistanê bi komî 79 rojnamevan girtî ne, li tu deverên cîhanê tişteke wisa nîne. Êriş, binçavkirin û girtinên li dijî çapemeniya azad berdewam dikin. Weke çapemeniya azad dê li dijî van têkoşîna me bidome. Têkoşîna hevrêyên me rêya me ronî dikin.”

	&nbsp;

	Bîranîn bi berzkirina dirûşmeya “Şehîd namirin” bi dawî bû.&nbsp;

	&nbsp;