Erdogan ‘Qanûna Sansurê’ pejirand 2022-10-18 10:07:38 ENQERE - Piştî ku Serokkomarê AKP’î Tayyîp Erdogan Qanûna Sansurê pejirand di Rojnameya Fermî de hate pejirandin.    Serokê Giştî yê AKP’ê û Serokkomar Tayîp Erdogan Qanûna Çapemeniyê ya bi hejmara 7418’an û Qanûna Têkildarî Guhertinên di Hin Qanûnan de pejirandin. Piştî pejirandina Serokkomarê AKP’î Erdogan biryar di Rojnameya Fermî de hate weşandin. Dê hin hukmên qanûnan ji 1’ê çile û 1’ê nîsana 2023’an şunde bên pêkanîn.    Bi derxistina Qanûna Sansurê re hem zexteke mezin li ser weşangeriya serbixwe ya înternetê, hem jî ji bo bikaranîna azadiya ramanê ya welatiyan, li medyaya dîjîtal û ragihandina şexsî, bû qanûn.   QANÛNA 29’AN    Bi xala 29’an a qanûnê re, ku herî zêde rastî nerazîbûnê hat, di bin navê ‘bi awayekî aşkere agahiyên şaş li raya giştî belav dike’ sûcekî nû li Qanûna Ceza ya Tirk (TCK) hate zêdekirin. Pêşkêşvanên tevna dîjîtal wê neçar bimînin ku agahiyên ji aliyê BTK’ê ve hatine xwestin bidinê. Partiya Gel a Komarê (CHP) diyar kiribû ku wê piştî erêkirina Erdogan qanûna sansurê veguhêzin Dadgeha Destûra Bingehîn (AYM).