
Rojnamevan: Divê saziyên navnetewî xwedî li rojnamevanan derkevin  

2022-10-27 11:35:32


	&nbsp;

	STENBOL - Rojnamevanan diyar kir ku îşkence û muameleya xerab a li dijî hevpîşeyên wan ku hatin binçavkirin nayê qebûlkirin û armanca îktidarê ew e ku rastiyan bêdeng bike.&nbsp;

	&nbsp;

	Di çarçoveya lêprisîna ku Serdozgeriya Komarê ya Enqereyê daye destpêkirin de 11 nûçegihanên Ajansa Mezopotamya (MA) û JinNewsê di 25’ê cotmehê de hatin binçavkirin. Nûçegihana MA’yê Zemo Aggoz piştî karûbarên îfadeyên li emniyete bi şertê hefskirina malê hat berdan.&nbsp;

	&nbsp;

	Nerazîbûna li dijî binçavkirina rojnamevanan her ku diçe zêdetir dibe. Rojnamevan Alî Dûran Topûz, Candan Yildiz û Dogan Ozguden bertek nîşanî binçavkirina hevpîşeyên xwe dan.&nbsp;

	&nbsp;

	‘DIVÊ PIŞTGIRÎ PÊL BI PÊL MEZIN BIBE’&nbsp;

	&nbsp;

	Rojnamevan Alî Dûran Topûz destnîşan kirk u îktidar dixwaze ku muxalefetê bîne wê astê ku nikaribe ji kurdan dengan bixwaze û vê yekê jî bi operasyonên li dijî rojnamevanan dike. Topûz da zanîn ku îktidar ji bo hilbijartinê zemînekê amade dike û dixwaze kapasîteya medyaya kurd jî sînordar bike û di armanca wê de ev heye. Topûz anî ziman ku tişta ku tê armanckirin rojnamevanî ye û divê piştevaniya bi rojnamevanan re pêl bi pêl zêdetir bibe û divê partiyên muxalefetê jî ji bo rojnamevanan têbikoşin.&nbsp;

	&nbsp;

	BINÇAVKIRIN SEPANÊN QANÛNA SANSÛRÊ NÎŞAN DIDE&nbsp;

	&nbsp;

	Rojnamevan Cancan Yildiz jî 16 rojnamevanên kurd ên li Amedê hatin girtin bi bîr xist û bi binçavkirina 11 rojnamevanan re jî tê xwestin ku nûçeyên derbarê binpêkirinên mafan ên kurdan neyên bihîstin. Yildiz da zanîn ku binçavkirina rojnamevanan sepanek fîlî ya qanûna sansûrê ye û ev jî dide nîşandan ku qanûna sansûrê li pêşiya rojnamevanan çawa dibe asteng. Yildiz anî ziman ku bi îşkenceyê û muameleya xerab hatiye xwestin ku rojnamevanan bitirsînin û îşkence û kelemçekirina ji pişt ve nayê qebûlkirin.&nbsp;

	&nbsp;

	‘DIVÊ SAZIYÊN NAVNETEWÎ XWEDÎ LI ROJNAMEVANAN DERKEVIN’&nbsp;

	&nbsp;

	Rojnamevan Dogan Ozguden jî bertek nîşanî binçavkirina hevpîşeyên xwe da û got: “Îktidara faşîst a ku çavsor bûye, dizane ku di hilbijartina pêşî de wê têk here, lewma berê xwe dide rojnamevanan. Rejîma faşîst a Tayyîp dixwaze rojnamevanên netewa kurd ku dostên me ne bike hedef. Divê ku rêxistinên çapemeniyê yên navnetewî wek Bittabi, FIJ, IPI, RSF bêtir xwedî li têkoşîna rojnamevanên dirûst derkevin.”&nbsp;

	&nbsp;