
ÎHD’ê bîlançoya salekê ya tundiya li ser jinan a bakurê Kurdistanê eşkere kir 

2022-11-24 15:29:16


	&nbsp;

	AMED - Komîsyonan Jinan a Şaxa ÎHD’a Amedê bîlançoya tundiya li dijî jinan a salane ya li bajarên bakurê Kurdistanê eşkere kir û wiha got: “Li bakurê Kurdistanê di salekê de 117 jinan jiyana xwe ji dest dan û 34 jin jî birîndar bûn.”&nbsp;

	&nbsp;

	Komîsyona Jinan a Şaxa Komeleya Mafên Mirovan (ÎHD) a Amedê bîlançoya tundiya zilam a li dijî jinan a di navbera 1’ê mijdara 2021’an û 1’ê mijdarê 2022’yan de ya li bakurê Kurdistanê, bi daxuyaniyekê eşkere kir. Daxuyanî li avahiya Şaxa ÎHD’ê ya Amedê hat dayîn. Nirxandina raporê endama Komîsyona Jinan parêzer Derya Yildirim kir û bîlançoya salan e jî ji hêla Endama Komîsyona Zarokan a Şaxa ÎHD’a Amedê Eylul Ozgultekîn ve hat eşkerekirin.&nbsp;

	&nbsp;

	‘TEKOŞÎNA JINAN’

	&nbsp;

	Derya Yildirim anî ziman ku tundiya li dijî jinan her ku diçe zêdetir dibe û berdewam dike. Yildirim, destnîşan kir ku jin di civake de rastî tundiya derûnî, aborî, çandî û fizîkî tên û wiha got: “Lê li dijî vê yekê saziyên berpirsyar tu gavan naavejin. Têkoşîna jinan a li dijî vê xwedî pêvajoyeke demdirêj e û bênavber didome.”&nbsp;

	&nbsp;

	TUNDIYA DEWLETÊ YA LI DIJÎ JINÊN KURD

	&nbsp;

	Yildirim, di berdewama axaftina xwe de balkişand ser Jîna Emînî ku di 14’e îlonê de ji aliye rejîma Îranê ve hatibû qetilkirin û wiha domand: “Piştî vê qetlîamê serhildan ji Rojhilat dest pê kir û di encama serhildanan de gelek kes hatin qetilkirin û jin jî rastî qetlîam, tundî û êrişan hatin. Lê der barê polîtîkayên cihekar de tu gavek nehat avêtin. Li bakurê Kurdistanê û Tirkiyeyê siyasetmedarên jin tên binçavkirin û girtin. Binçavkirin û girtina siyasetmedarên jinên kurd tundiya derûnî û dadgehê ya li dijî jinan nîşan dide. Girtina Gulten Kışanak, Ayla Akat Ata, Fîgen Yuksekdag, Sabahat Tuncel û gelek siyasetmedarên jinên kurd, encama vê yekê ye.”&nbsp;

	&nbsp;

	POLÎTIKAYÊN BÊ CEZAKIRINE

	&nbsp;

	Di berdewamê de Yildirim bal kişand ser polîtikayên dewletê yên necezakirinê û ev tişt anî ziman: “Dewlet berpirsyar e ku pêşiya qetilkirin û tundiya li dijî jinan bigre. Divê dewlet ji bo wekheviya civakî, polîtîkayan saz bike. Divê cihêkariya zayendî ji hole rake. Kesen ku tundiyê li jinan dikin divê bên cezakirin û dev jî polîtikayên necezakirinê berde.”

	&nbsp;

	BÎLANÇOYA SALANE

	&nbsp;

	Piştî Yildirim, Endama Komîsyona Zarokan a Şaxa ÎHD’a Amedê Eylul Ozgultekîn bîlançoya salane xwend. Bîlançoya salakê ya tundiya li dijî jinan a li bakurê Kurdistanê wiha ye:&nbsp;

	* Li bajarên bakurê Kurdistanê 11 jinan ji ber întîharê jiyana xwe ji dest dan. 5 jinan jî xwest întîhar bikin.

	* Ji ber tundiya zilam a di nava malê de herî kêm 38 jinan jiyana xwe ji dest dan û 15 jin jî birîndar bûn.

	* Di nav civakê de 19 jinan ji ber tundiya zilam jiyana xwe ji dest dan û 14 jin jî birîndar bûn.

	* Di nava civakê de 33 jin rastî destdirêjiya mêran hatin.&nbsp;

	* Li bakurê Kurdistanê 49 jinan bi awayekî bi guman jiyana xwe ji dest dan.

	* Li bakurê Kurdistanê di salekê de 117 jinan jiyana xwe ji dest dan û 34 jin jî birîndar bûn.

	* Li herêmê herî zêde jin li bajarên, Dîlok, Xarpêt, Amed û Şirnexê rastî qetilkirin û tundiyê hatin.

	* Herî zêde li Wan, Riha, Amed û Mêrdînê jinan bi awayekî guman jiyana xwe ji dest dan.”

	&nbsp;