
Li Qamişloyê bi hezaran kes ji bo azadiya Abdullah Ocalan meşiyan

2022-12-01 17:07:26


	&nbsp;

	NAVENDA NÛÇEYAN - Bi hezaran kesên tev li meşa li Qamişloyê hate lidarxistin bûn, piştgirî dan şermezarkirina Rêberê PKK’ê Abdullah Ocalan a CPT’yê û daxwaza azadiya Ocalan kirin.&nbsp;

	&nbsp;

	Însiyatîfa Gel a Herêma Cizîrê ji bo piştgiriya helwesta Rêber Abdullah Ocalan a redkirina hevdîtina bi Komîteya Pêşîlêgirtina Îşkenceyê ya Ewropayê (CPT) re meşek li dar xist. Bi sedan kurd, ereb û suryan û endamên TEV-DEM, Tevgera Ciwanên Şoreşer, PYD, Kongreya Star, hiqûqnas û Yekitiya Jinên Ciwan tev li meşê bûn. Girseyê di meşa ji xaçerêya Şerq a li rojhilatê bajarê Qamişlo dest pê kir de wêneyên Rêberê PKK’ê Abdullah Ocalan hilgirtin û heta ber deriyê Şaredariya Gel a Qamişloyê dirûşmeyên “Bijî Serok Apo” û “Bê serok jiyan nabe” berz kirin.

	&nbsp;

	BERXWEDANA GEL HATE SILAVKIRIN

	&nbsp;

	Piştî deqîqeyekê rêzgirtinê, endamê Însiyatîfa Gel a Herêma Cizîrê Kenan Berekat axivî. Kenan Berekat berxwedana gel a li dijî êrişên dewleta tirk silav kir û got: “Gelê beşdarî vê meşa piştgiriyê bûye, li hemberî êriş û sûcên dewleta tirk a dagirker li ber xwe dide û bi îrade û israreke xurt bi xaka xwe ve girêdayî ye. Ev gel careke din xwedîderketina xwe li Rêber Ocalan û berxwedana wî ya li girtîgeha Îmraliyê nîşan dide.”

	&nbsp;

	DAXWAZA AZADIYA OCALAN

	&nbsp;

	Berekat bal kişand ser tecrîda girankirî ya li ser Rêberê PKK’ê Abdullah Ocalan û wiha berdewam kir: “Tecrîd heta roja me ya îro berdewam dike, lê gelê me têkoşîna xwe ya li ser esasê fikrên Rêber Ocalan didomîne û hêz û îradeya xwe ji hêzên xwe yên leşkerî û berxwedana Rêber Ocalan digire. Ev yek îsbat dike ku gel bi fikrê rêbertiya xwe ve girêdayî ye.”

	&nbsp;

	Kenan Berekat di dawiya axaftina xwe de bang li şêniyan kir ku ji bo mîsogeriya azadiya fîzîkî ya Ocalan têkoşînê xurt bikin û li derdora Ocalan kom bibin.

	&nbsp;

	Çalakî bi berzkirina dirûşmeyên “Berxwedan jiyan e” , “Serkeftin ya me ye” û tîlîliyên dayikan bi dawî bû.

	&nbsp;

	&nbsp;