
Polîsan li Wanê êrişî meşa li dijî tecrîdê kirin 

2022-12-12 14:33:32


	WAN - Gelê Wanê bi mebesta protestokirina tecrîda girankirî ya li ser Rêberê PKK’ê Abdullah Ocalan xwest meşê li dar bixe. Polîsan êrişî meşê kir û herî kêm 40 kes hatin binçavkirin.&nbsp;

	&nbsp;

	Kongreya Civaka Demokratîk (KCD), Tevgera Jinên Azad (TJA), Partiya Herêmên Demokratîk (DBP), Partiya Demokratîk a Gelan (HDP), Federasyona Komeleyên Hiqûq û Piştevaniya bi Malbatên Girtî û Hikûmxwaran re ya Medê (MED TUHAD-FED), Komeleya Parêzerên ji bo Azadiyê (OHD) û Meclisa Dayikên Aştiyê ji bo protestokirina tecrîda girankirî ya li ser Rêberê PKK’ê Abdullah Ocalan ku li Girtîgeha Tîpa F a bi Ewlekariya Bilind a Îmraliyê tê ragirtin û polîtîkayên şer, li Wanê kom bûn û xwestin meşê li dar bixin. Hevserokê KCD’ê Berdan Ozturk, Hevserokê Giştî yê DBP’ê Keskîn Bayindir, Parlamenterên HDP’ê Sezaî Temellî, Mûrat Sarisaç, Muazzez Orhan, Huseyîn Kaçmaz, Hasan Ozguneş, endam û rêveberên HDP û DBP’ê yên navend û navçeyan û gelek kes tev li çalakiyê bûn. Beşekê girseyê li pêşiya Aydin Perîhan AVM’ê û du beşên din jî li her du aliyên Xaçerêya Ezbercîlerê kom bû. Dihat payîn ku her sê beş bigihin hev û ber bi TUHAD-FED’ê ya li Kolana Hunerê ve bimeşin.&nbsp;

	&nbsp;

	DESTÛRÊ NADIN MEŞÊ&nbsp;

	&nbsp;

	Piştî ku girse li pêşiya AVM’ê hatî ba hev, polîsan ketin û derketina hemû kolanan qedexe kir. Gelê bajêr jî bertek nîşanî dorpêça polîsan da û dirûşma “Bijî berxwedana zindanan” berz kir. Polîsan destûr neda ku girseya hatiye dorpêçkirin bimeşe. Piştre jî polîsan êrişî girseyê kir û zêdetirî 40 kes hatin binçavkirin. Girse hêj li bendê ye ku bimeşe.&nbsp;

	&nbsp;

	BI BOMBEYÊN GAZÊ ÊRIŞ KIRIN&nbsp;

	&nbsp;

	Koma ku li Xaçerêya Ezbercîlerê hatibû ba hev jî ji hêla polîsan ve hat dorpêçkirin. Welatiyên ku dixwestin tev li meşê bibin, ji hêla polîsan ve hatin astengkirin û binçavkirin. Parlamenterên HDP’ê bertek nîşanî polîsan dan û xwestin ku rê were vekirin. Girseya gel hêj li cihê xwe ye û gelek kes jî li ketin kolanên bajêr û dirûşma “Bijî berxwedana zindanan” berz kirin . Her wiha polîsan bombeyên gazê avêtin girseyê û guleyên plastîk lê reşandin. Jineke ku tev li meşê bûbû, di dema êrişê de ser hişê xwe çû. Parlamenterê HDP’ê Sezaî Temellî jî wiha bertek nîşan da: “Hûn binçav dikin êdî çi dikin bikin lê destê xwe nêzî dayikan nekin.”&nbsp;

	&nbsp;

	BAJÊR HATIYE DORPÊÇKIRIN

	&nbsp;

	Cadeyên Cumhuriyet, Maraş û Kişlayê yên ku dê meş lê bihata lidarxistin û hemû rêyên ber bi van cadeyan ve diçin ji hêla polîsan ve hatibûn dorpêçkirin. Balkêş e ku helîkopter li ser bajêr pir nizm firiyan. Polîsên ku tevahiya kolanan girtin, GBT’ya her kesî kirin. Kolanên bajêr bi tevahî hatine dorpêçkirin û li pêşiya avahiyên HDP, DBP û hemû saziyên din jî polîs hatin bicihkirin.&nbsp;

	&nbsp;