Aydar navê kujerê Nagihan Akarsel eşkere kir 

2022-12-27 16:46:41


	 

	
		NAVENDA NÛÇEYAN - Endamê Konseya Rêveber a KCK’ê Zubeyîr Aydar eşkere kir ku kujerê rojnamevan-akademîsyen Nagihan Akarsel, Îsmaîl Peker ê ji Mamaka Enqerê ye. 
	
		 
	
		Endamê Desteya Rêveber a KCK’ê Zubeyîr Aydar di 25’ê kanûnê de beşdarî bernameyek Stêrk TV bû û diyar kir ku kesê ku endama Navenda Lêkolînên Jineolojiyê û rojnamevan Nagihan Akarsel kuştiye Îsmaîl Peker e. Aydar destnîşan kir ku kujer ji Mamaka Enqerê ye û wiha got: “Jixwe ev kesek krîmînal e. Jixwe ew jî li xwe mikûr hat. Em dizanin ku wî kesî çi gotiye û çi îtîrafan kiriye. Vî kesî di îfadeya xwe de gotiye, ‘jixwe ez ji bo vê yekê hatime vir (Ji bo kuştina Nagihan Akarsel). Pere dan min. Her tiştî dan min’. Yanî plansaziyek kirine û şandine wir. Her wihda kujer dibêje, ‘li min geriyan, gotin Nagihan ji malê derdikeve’. Min malê tespît kiribû. Min malê tespît kiribû û li cihekî nêzî wir disekinîm. Min dît ku Nagihan dimeşe û min wê li serê kuçeyê kuşt. Paşê min plansaziya reva bo Hewlêrê kir’. Çimkî difikire heke bireve Hewlêrê wê xwe xelas bike. Ji wî re wisa hatiye gotin.” 
	
		 
	
		‘HEWLÊR JI BO WAN CIHÊ XELASIYÊ YE’ 
	
		 
	
		Aydar destnîşan kir ku heta niha çiqas bûyer qewimîne kujer hemû reviyane Hewlêrê û got: “Jixwe Hewlêr wek Enqerê ye. Hewlêr ji bo wan cihê xelasiyê ye. Lê ew kujer beriya bireve hewlêrê asayîşa Silêmaniyê wî girtin. Gelek tiştan îtîraf kiriye. Lê em dikarin ewqasî bêjin. Kujerê êrişa li Parîsê jî yekî mîna vî kujerê li Silêmaniyê ye. Yê ku tetikê kişandiye ne girîng e, ya girîng ew e ku kê planê kiriye.”