
Di kongreya OHD’ê de berteka li dijî tecrîdê  

2023-01-27 15:15:33


	&nbsp;

	RIHA - Di 2’yemîn Kongreya Asayî ya Şaxa OHD’a Rihayê de beşdaran bal kişand ser tecrîda li ser Rêberê PKK’ê Abdullah Ocalan û wiha gotin: “Bi tecrîdê re dixwazin heqîqetê parçe bikin û civakîbûnê birûxînin.”&nbsp;

	&nbsp;

	Şaxa Komeleya Hiqûqnasên ji bo Azadiyê (OHD) ya Rihayê li Eywana Konferansan a Tahir Elçî ya Baroya Rihayê 2’yemîn Lijneya Giştî ya Asayî li dar xist. Li eywana konferansê pankartên “Tecrîd sûcekî li dijî mirovahiyê ye”, “Ji bo civakek azad û demokratîk hûqûqa azadîxwaz", "Girtiyên nexweş berdin” û “Li dijî kedxwarî, tundî û newekheviyê bijî têkoşîna jinan” hatibûn daliqandin. Partiya Demokratîk a Gelan (HDP), Partiya Herêmên Demokratîk (DBP), Tevgera Jinên Azad (TJA), Baroya Rihayê, rêveberên Hewldana 78’an, Komeleya Mafên Mirovan (ÎHD), Yekitiya Endezyarên Madenê yên Tirk (TMMOB), Dayikên Aştiyê, Platforma Şaxan a Konfederasyona Sendîkayên Kedkarên Cemaweriyê (KESK), Malbata Şenyaşar û gelek kesên din tev li lijneyê bûn.&nbsp;

	&nbsp;

	‘MÎNAKA 'GUANTANAMOYÊ DERBAS KIR’&nbsp;

	&nbsp;

	Kongre, bi deqeyek rêzgirtinê dest pê kir. Piştre jî sînevîzyona ku xebatên Şaxa OHD’a Rihayê v edibêje hate pêşandan.&nbsp;

	&nbsp;

	Alî Arslan ê OHD’î ku di dîwanê de cih digirt bal kişand ser tecrîda girankirî ya li ser Rêberê PKK’ê Abdullah Ocalan û wiha got: “Li tu deverekê cîhanê sepana tecrîdê nîne. Vê rewşê êdî mînaka Guantanamoyê jî derbas kir. Weke OHD’a Rihayê me ji bo hevdîtina li Îmraliyê serî li Yekitiya Baroyan a Tirkiyeyê (TTB) da. Lê hêj bersivek nehatiye dayîn. Divê rojeva sereke ya TBB û Baroya Rihayê bibe bidawîkirina vê bêhiqûqiyê.”

	&nbsp;

	'OHD LI DIJÎ BINPÊKIRINA MAFAN E’

	&nbsp;

	Piştre jî Hevseroka Şaxa OHD’a Rihayê Meral Halat axivî. Halat, da zanîn ku weke OHD’ê li dijî binpêkirina mafan e û wiha domand: “Ev sekna me dê her tim bidome. Weke civak em di pêvajoyeke zehmet de ne. Li rexekî tecrîd, zext û tundî, li rexa din jî nenaskirina qanûnan. Di rewşeke wiha de piştevanî û têkoşîn pir girîng e. Bi tecrîdê re heqîqet tê parçekirin û civakîbûn tê hilweşandin. Di her qada jiyana me de tecrîd heye, li dijî jinan polîtîkayên şerê taybet tên meşandin û tundiya darazê tê kirin. Di demekî ku bêhiqûqî ewqas jirêzê tên hesibandin de weke OHD’ê em ê her tim li dijî van sepanan derkevin.”

	&nbsp;

	Piştî axaftinan jî rêveberiya nû hate hilbijartin. Di dengdayînê de hevserokên heyî Îbrahîm Halîl Oyke û Meral Halat dîsa hatin hilbijartin.&nbsp;

	&nbsp;