Ulkuciyan mexdûra erdhejê şêland! 2023-02-09 12:03:48   MEREŞ - Komên ulkucî yên di bin navê “dilxwazên" AFAD’ê de hatine navçeya Bazarcixê ku navenda erdhejê ye, dest bi şêlandina mexdûrên erdhejê kirin. Ulkuciyan 2 hezar û 350 Euro û 16 zêrên tam ên mexdûra erdhejê Asiye Kuşne jê stendin.    Di 6’ê Sibatê de li navçeya Bazarcixê ya Mereşê bi pileyên 7.7 û 7.6 du erdhejên mezin çêbûn. Ev erdhej li tevahiya bakurê Kurdistanê hat hîskirin û di serî de li Mereş û Dîlokê li bajarên mîna Riha, Semsûr, Meletî, Amed, Xarpêt û Kîlîsê bû sedema hilweşandin ango karesatek mezin. Her wiha erdhejê bandora xwe li bajarên Tirkiyeyê yên mîna Edene û Hatayê jî kir û bi sedan avahî li van her du bajaran jî hilweşiyan. Li herêma erdhejê bi hezaran mirov jiyana xwe ji dest dan û bi hezaran mirov jî di bin kavilên hilweşandî de ne.   Li navçeyê bi sedan avahî hilweşiyayî ne û tu avahiyeke ku xesar negihiştibê nemaye. Li gorî nûçeya Kadrî Esen û Bîlal Gezer ên nûçegihanê rojnameya Xwebûnê; endamên ocaxên ulkuciyan ku di bin navê "dilxwazên” AFAD’ê de hatine navçeye dest bi şêlandin mexdûrên erdhejê kirine.   ‘QIYAMET BÛ'    Li taxa Fatîhê ya Bazarcixê welatiya bi nave Asiye Kuşne ku bi tena serê xwe dijî û xesareke mezin gihîştiye mala wê piştî mexdûrbûna erdhejê ji aliyê komeke ulkucî ve cara duyemîn hat mexdûrkirin. Kuşne ku mala wê li kolana Avûkat Şevket Ozok a taxa Fatîhê ye qala bûyera hatiye serê wê kir.    Kuşne ewilî qala kêliyên erdhejê kir û wiha got: “Ez bi tena serê xwe dijîm, lê di bînaya me de em çar malbat bûn. Dema ku erdhej çêbû, em derketin derve. Li derve qiyamet pêk dihat. Her kes ber bi cihekê ve direviya. Ez jî hatim avahiya ku dayik û bavê min lê diman geriyam û min ew derxist derve. Piştre em ketin wesayîtan û wisa xwe ji sermayê parast.”   GEF LÊ WARIYE Û WÊ ŞÊLANDIYE    Kuşne destnîşan kir ku komeke ulkuci wê şêlandiye û derbarê mijarê de ev agahî dan: “Pere û zêrên min li malê hebûn, ji bo ku wan bigirim min biryar da ku biçim malê û wan derbixim. Dema ku ez ber bi malê xwe ve diçum di rê de 4 kesên ku êlekên ocaxên ulkuciyan li wan bûn liqayî min hatin û min ji wan pirsî ku biçim mala xwe gelo tiştek bibe yan na. Destpêkê gotin neçe xetere ye. Lê dema ku min mijara pere û zêran vekir û ji wan alîkarî xwest û derbasî mala xwe bûm; ji 4 ulkuciyan yek ji wan jî da pey min û ew jî hat mala min. Dema ku min pere û zêrê xwe derxist ew kes min kişand odeyekê û got ku divê tu li vir pere bidî min. 2 hezar û 350 Euro ji min girt. 16 zêrên tam û çaryekek min jî hebûn. Piştî ku pere ji min girt û got ku divê ez zêran jî bidimê. Min got na ez nadim lê wan jî ji min girt û xwest ku ez ji kesî re nebêjim.”   ‘DILXWAZÊN' DIZEK    Kuşne da zanîn ku dema ku bi vê şêlandina ulkuciyan re rûbirû maye gelek tirsiyaye û got: “Em di avahiyeke bi xeter de bûn. Tişta ku hatibû serê min ne bes bû ez bi rewşeke din re rû bi rû mam. Dema em derketin derve min jê re got qet nebe beşek pere û zêrê min bide min. Ji min re got li milê xwe yê rastê vegere û bêyî ku li pişt xwe binêrî biçe. Piştre li xwe arqil îm û ji xwe re got min çi kir? Min ji xizmên xwe re bûyerê vegot. Li vir rewş wisa xerab e tevî ku ez çûm cem kesên bi vê mijarê re mijûl dibin jî gotin ku ew ulkucî dilxwaz in, niha çûne û tiştekî ku ew bikin tune ye.”   POLÎS NEBÛNE ALÎKAR    Kuşne herî dawî diyar kir ku ji bo gilîkirinê serî li polîsan daye lê jê re nebûne alîkar û ew aresteyî qaymeqamiya Bazarcixê kirine.