
Li Amedê welatî li ber deriyên morgan li benda cenazeyan in

2023-02-13 14:37:36


	AMED - Li Amedê bi sedan kes li ber deriyên morgên nexweşxaneyên Amedê li bendê sekinîne ku cenazeyên qurbaniyên erdhejê werbigirin.&nbsp;

	&nbsp;

	Li Amedê heta niha ji bin xirbeyên 7 avahiyên hilweşiyabûn, 319 cenaze hatine derxistin û bi ser 900 kesî re jî birîndar hene. Li avahiyên Işik, Akar (Hîsamî) û Yoldaş ên li navçeya Rezanê hilweşiyabûn, duh xebatên lêgerîn û rizgarkirinê bi dawî bûn. Li ser xirbeyên avahiyên hilweşiyayî Diyar Galeria (2 blok), Selîn 2 (Cengizler) û Sozel xebatên lêgerîn û rizgarkirinê berdewam dikin. Tê texmînkirin ku hê jî 60 kes di bin xirbeyê avahiya Diyar Galeria de ne.&nbsp;

	&nbsp;

	BI SEDAN WELATÎ LI BER DERIYÊN MORGÊ NE&nbsp;

	&nbsp;

	Bi dehan cenazeyên ji bin xirbeyan hatine derxistin, li morgên nexweşxaneyan tên rawestandin. Bi dehan malbat û bi sedan welatî li ber morgan sekinîne û li benda wergirtina cenazeyan in. Bi dehan malbat bi awayek xemgînî li ber morga Nexweşxaneya Dewletê ya Selahattîn Eyyubî rawestiyan e û li bendê ne ku cenazeyên xwe werbigirin. Welatiyên ku li ber morgê ne li ser qurbaniyan dilorînin.&nbsp;

	&nbsp;

	Parlamentera HDP’ê ya Amedê Remziye Tosûn, Hevserokê HDP’a Amedê Zeyyat Ceylan û rêveberên Partiya Çep a Kesk û HDP’ê serdana malbatên dilşewat kirin û sersaxiyê ji malbatan re xwestin.&nbsp;