
Xizmên Windayan: Bila kujer bên darizandin  

2023-02-18 16:31:38


	&nbsp;

	ÊLIH/AMED - Xizmên Windayan û rêveberên ÎHD’ê li Êlihê aqûbeta Cuneyt Aydinlar û li Amedê jî li kujerên Bedriye Gumuş pirsîn.

	&nbsp;

	Li Êlihê Xizmên Windayan û rêveberên Komeleya Mafên Mirovan (ÎHD) di hefteya 568’emîn de li serê Cadeya Gulistanê çalakiya “Bila winda bên dîtin û kujer bên darizandin” li dar xistin. Di çalakiya ku li ber Peykerê Mafên Mirovan hat lidarxistin de wêneyên windayan hatin hildan. Hevserokê ÎHD’a Êlihê Devran Yildiz axivî û serpêhatiya Cuneyt Aydinlar ê di 20’ê sibata 1994’an de li navçeya Bakirkoya Stenbolê di binçavan de hat windakirin û carek din agahî jê nehat girtin parve kir.&nbsp;

	&nbsp;

	Yildiz da zanîn ku Cuneyt Aydinlar di destpêka salên 90’î de ji Amedê ji bo xendina zanîngehê diçe Stenbolê û li Zanîngeha Stenbolê beşa îktisadê dixwîne û polîs wî li Bakirkoyê dikin binçavan û wek her windakirî wî jî dibin Midûriyeta Polîsan a Stenbolê ya li Gayrettepeyê. Yildiz anî ziman ku di binçavan de îşkenceyek giran li Aydinlar hatiye kirin û 14 kesên li gel Aydinlar di binçavande bûne tên girtin û piştî tên girtin bi rêya parêzerên xwe dibêjin ku Aydinlar di 20’ê sibatê de hatiye binçavkirin û wî heta 2’yê adarê dîtine û şûnve wî nedîtine. Yildiz got ew koma girtî gotine ku polîsan gefên kuştinê li Aydinlar xwarine.&nbsp;

	&nbsp;

	Yildiz da zanîn ku her çiqas doza derbarê windakirina Aydinlar de hat vekirin jî lê bi hêceta demboriyê bi biryara neşopandinê hat bidawîkirin.&nbsp;

	&nbsp;

	AMED&nbsp;

	&nbsp;

	Xizmên Windayan û rêveberên ÎHD’a Amedê jî ji ber karesata erdhejê vê hefteyê çalakiya xwe li dar nexistin û daxuyanî nivîskî belav kirin. Di daxuyaniyê de serpêhatiya Bedriye Gumuş a li Nisêbîna Mêrdînê di 17’ê sibata 1992’yan de ji aliyê leşkeran ve tê qetilkirin hat parvekirin û hat xwestin ku kujerên Gumuş demildest werin dîtin û darizandin.&nbsp;

	&nbsp;

	&nbsp;

	&nbsp;

	&nbsp;