
MSD: Berpirsyarê komkujiya li Efrînê dewleta tirk û amûrên wê ne  

2023-03-22 16:59:44


	NAVENDA NÛÇEYAN - MSD’ê têkildarî 4 kesên bi hinceta pîrozkirina Newrozê li Efrînê ji hêla komên paramîlîter ve hatin qetilkirin, daxuyanî da û wiha got: “Berpirsyarên vê komkujiyê, îktîdar û dûvikên wê yên Efrîn dagirkirin in.”&nbsp;

	&nbsp;

	Komên paramîlîter ên girêdayî dewleta tirk di êvara Newrozê (20’ê adarê) de li navçeya Cindirês a Efrînê êrişî pîrozbahiya Newrozê kirin û komkujiyek pêk anî. Di êrişê de ji heman malbatê 4 welatiyên sivîl bi hovane hatin qetilkirin. Meclisa Sûriyeya Demokratîk (MSD) têkildarî komkujiyê daxuyaniyek da û xwest ku berpirsyarên vê hovîtiyê bên darizandin.&nbsp;

	&nbsp;

	MSD’Ê bi bîr xist ku di 20'ê adarê de komên paramîlîter ên dewleta tirk piştgiriya wan dike, li navçeya Cindirêsê dema agirê Newrozê vêdixistin 4 bira qetil kirine. Bi domdarî MSD’ê wiha got: “Em vê komkujiyê û bêdengiya li hemberî wê şermezar dikin û ji bo malbatên şehîdan sersaxiyê dixwazin.&nbsp;

	&nbsp;

	‘BERPIRSYARÊN SÛC DEWLETA TIRK Û AMÛRÊN WÊ NE’

	&nbsp;

	Ev sûc, encama dagirkerî, koçberkirin û kiryarên dijminatiya li dijî kurdan e. Sûcê ku li Cindirêsê hate kirin ji çarçoveyeke siyasî, ewlehî û civakê tê. Desthilata dagirker û amûrên wê yên ku Efrîn dagirkirin, rasterast ji vî sûcî berpirsyar in. Di heman demê de hemû aliyên ku çavê xwe li sûcên domdar ên dagirkirî û koçberkirina niştecihên resen girtine berpirsyar in.&nbsp;

	&nbsp;

	Divê tavilê ev tevdîr werin girtin;&nbsp;

	&nbsp;

	* &nbsp;Divê Efrîn weke herêmeke mirovî ya bêçek were ragihandin û tevahî komên çekdar jê werin derxistin. Divê niştecihên resen bi çavdêriya civata navneteweyî bi ewle vegerin warê xwe.

	&nbsp;

	* Divê berpirsên komkujiyên li dijî mirovahiyê û binpêkirinên rojane yên qanûnên mirovî yên navneteweyî werin muhasebekirin.

	&nbsp;

	* Divê rêveberiya herêma Efrînê û ewlehiya wê radestî niştecihên wê yên resen bê kirin û sîstemeke dozgerî ya adilane were avakirin.

	&nbsp;

	* Divê hemû girtî û revandî serbest werin berdan. Divê aqûbeta ku kesên bi darê zorê winda bûne were eşkerekirin. Her wiha divê tazmînatê bidin kesên ku ziyan dîtîne.&nbsp;

	&nbsp;

	* Divê temînata derbasbûna dezgehên ragihandinê û rêxistinên hiqûqî yên navneteweyî bo Efrînê were dayîn da ku karên xwe bi serbestî bikin.”

	&nbsp;