Buldan: Di 14’ê gulanê de bersiva herî xurt dê jin bidin 

2023-04-02 12:19:01


	ENQERE - Hevseroka Giştî ya HDP’ê Pervîn Buldan diyar kir ku dê di 14’ê Gulanê de rejîm were hilbijartin û wiha got: “Di 14’ê Gulanê de bersiva herî xurt em jin dê bidin kesên hebûna xwe li ser tunebûna jinan ava dikin.” 

	 

	Hevseroka Giştî ya Partiya Demokratîk a Gelan (HDP) Pervîn Buldan, di bernameya ragihandina Beyannameya Hilbijartinê ya Jinan a Meclisa Jinan Partiya Çep a Kesk de axivî. Buldan, jin bi kurdî silav kir. 

	 

	Buldan, diyar kir ku ya jin anîn vê astê, dîroka têkoşînê ya jinan e û wiha domand: “Bawerî û seknekî biisrar heye ku hêviya jinan her tim zindî dihêle. Jin dilwêrek hene ku tevî hemû zehmetî û astengiyan jî bêdudilî keda xwe arasteyî vê dîroka têkoşînê kirine.”

	 

	Bi domdarî Buldan jinên di girtîgehê de, yên li sirgûnê, yên li pey şopa heqîqetê, yên hesaba windakiriyan, yên li edaletê digerin, jinên nobetên edaletê digirin û hemû jinên têkoşer silav kir û wiha pê de çû: “Îro ev kursî ya me ye, ev beyanname ya me ye, ev hilbijartin a me ye. Dê serkeftina di vê hilbijartinê de ya me be. Sedsala nû ya me ye, serkeftin a me ye. Dem dema wê ye ku em vê bi saya vê berxwedana mezin û têkoşîna xwe ya bêhempa jiyanê jinûve ava bikin. 

	 

	TÊKOŞÎNA YEKBÛYÎ YA JINÊN HER ÇAR ALIYÊN CÎHANÊ

	 

	Beyannameya me ya jinan, beyannameya maf, azadî, demokrasî, wekhevî û edaletê ye ku jin bi sala ye têkoşîna wê didin. Beyannameya têkoşîna Denîz Poyraz û rêhevalên wê ye. Ez bi taybet jî dayika wê bi rêzdarî silav dikim. Têkoşîna bi rûmet a jinên îranî yên ku pora kirin alaya berxwedanê, Emîne Şenyaşar a li Rihayê ji bo edaletê têdikoşe, jinên efxan ên li dijî sepanên îmhakirinê têdikoşin û têkoşîna hemû jinên li her çar aliyên cîhanê li dijî baviksalarî û faşîzmê li ber xwe didin, îro li vir bûye yek. Û em jin, şirîkên wan ên niha îktîdar in di 14’ê gulanê de vedixwînin meydanê. Em li vir in, bi tu deverekê ve naçin. Em ê li dijî kompasên li dijî têkoşîna jinan, vebijêrkên xwe zêde bikin û pêşveçûna xwe bidomînin. Lewma em hilbijartinên pêş bi Partiya Çep a Kesk pêşwazî dikin. Em bi Tifaqa Ked û Azadiyê, bi tifaqa jinan û tifaqa xurt a hemû bindestan dikevin hilbijartinan. 

	 

	EM Ê HESABÊ ZEXT Û WÊRANIYAN BIPIRSIN

	 

	Yên ku 20 sal in li ser îktîdarê, di vê pêvajoyê de her cureyên tundiyê li dijî jinan bi kar anîn û jin hêjayî kedxwariyê, mercên giran ên xizantiyê û komkujiyê dîtin. Ji siyasetê heta daraz, burokasî û medyaya xwe ya qirêjî, bi hemû hêza xwe deriyên sûcên li dijî jinan vekirin. Me ev yek ji bîr nekiriye û dê nedin jibîrkirin. Em ê hesabê hemû êş, xemsarî û wêraniya wan ji vê îktîdarê bipirsin. 

	 

	EM JI BO GUHERANDINA REJÎMÊ TÊN

	 

	Em jin, li dijî karesata sedsalê, ji bo avakirina sedsalê tên. Em ji bo wekheviyê, ji bo demokrasiyê, ji bo derxistina heqîqetê û hevrûbûna dîrokî tên. Em, li dijî daraza qesrê; ji bo darazeke serbixwe tên. Em, ji bo pêşîlêgirtina tundiya ser jinan û cînayetên jinan tên. Ji bo mîsogerkirina ked û jiyana jinê em tên. Em, ji bo jin di hemû astên rêveberî û nûnertiyê û mekanîzmayên biryardayînê de xwedî mafê wekheviyê bên tên. Em ji bo mîsogerkirina pergala hevserokatiyê tên. Ji bo paratina hemû destkeftiyên xwe em tên. 

	 

	EM JI BO BIDAWÎKIRINA TECRÎDÊ TÊN

	 

	Em, ji bo hesabê ji xespa qeyûm bipirsin, ji bo her tiştê aydê xwe dîsa li xwe vegerînin, tên. Ji bo hilweşandina selteneta îktîdara yekzilamî em tên. Ji bo bidawîkirina sûcên li dijî mirovahiyê tên kirin, ji bo bidawîkirina faşîzm, Îşkence û polîtîkaya tecrîdê em tên. Em ji bo avakirina aştiyeke birûmet tên. 

	 

	14’Ê GULANÊ DÊ BIBE HILBIJARTINA REJÎMÊ

	 

	Em jin baş dizanin ku hilbijartinên 14’ê Gulanê ji bo jinan tenê hilbijartineke bijartina îktîdarê nîne. Ev hilbijartin dê ji bo jinan bibe bijartina rejîmê. Di 14’ê Gulanê de bersiva herî xurt em jin dê bidin. Em jin dê vê îktîdara dijminatiyê li jinan dike hilweşînin. Hin, hêza bingehîn a guherîn, veguherîn û jinûveavakirinê ne. Weke her carê, di vê hilbijartinê de jî em jin bi soza nûnertiya wekhev dikevin hilbijartinê. Em soz didin ku dê di serdema pêş de bi awayekî herî xurt di siyasetê de cih bigirin û rola xwe ya dîrokî bilîzin. Em, jin li ser xeta Rêya Sêyemîn tên ba hev.Di Rêya Sêyemîn de em dibêjin destpêkeke nû, sedsalake nû. Ev rê, ev hêz, ev îrade jî di bi saya Çep a Kesk, bi Tifaqa Ked û Azadiyê û bi tifaqa me jinan bi ser keve. Belê jinên hêja û delal; jin hebûna me ne. Jiyan berxwedana me ye. Azadî armanca me ye.”