Li Bismilê tundiya polîsan: Tevî zarokê xwe birîndar bû 

2023-05-11 11:35:07


	 

	AMED - Welatiyê bi navê Şeyhmus Eşen ku li navçeya Bismilê dijî, ji hêla polîsên rê li ber girtin ve hate derbkirin. Di dema bûyerê de zarokê Eşen jî birîndar bû. 

	 

	Welatiyê bi navê Şeyhmus Eşen ku li navçeya Bismil a Amedê dijî, rastî tundiya polîsan hat. Rêya Eşen ku şevê din bi wesayîtê diçû sûka navçeyê ji hêla polîsan ve hate girtin û hate derbkirin. Di dema bûyerê de zarokê wî yê 2 salî jî birîndar bû. Eşen, çû Nexweşxaneya Perwerde û Lêkolînê ya Gazî Yaşargîl a Amedê û rapora derbkirinê girt. Eşen, rapora derbkirinê bir û li Serdozgeriya Komarê ya Bismilê giliyê polîsên êrişkar kir. Eşen, têkildarî bûyerê bi ajansa me re axivî. 

	 

	'KULM LI RÛYÊ MIN DAN’

	 

	Eşen, da zanîn ku dema li Cadeya Îstasyonê diçû, rêya wî ji hêla polîsên weke “Yunus” tên pênasekirin ve hate birîn û wiha qala bûyerê kir: “Li min qêriyan û gotin; ‘bisekine, bisekine.’ Navî wî nizanim. Çawa gotin ‘bisekine’ ez sekinîm. Dema hatin cem min, li min qêriyan. Piştre jî heqaret li min kirin. Min jê re got; ‘Tu çima diqîrî li cem min zarok heye û ditirse.’ Ew jî li min qêriya û got; ‘tu çawa bersivê didî min.’ Bi berstûyê min girtin û kişand. Min jî ji bo ku zarok ji qoltixê nekeve xwarê, ew girt û axivîm. Li hêla din jî zarok ditirsiya û min hewl dida wî hayîş bikim. Dema min rûyê xwe zivirandî kulmek li serûçavên min da. Ez li ser dîreksiyonê bûm, serê xwe xist hundir û li min xist. Tiştek di destê wî de hebû lê min tam tespît nekir bê ka çi ye. Bênavber li rûyê min û laşê min dixist. Nêzî 10 polîsan li cem wî hebûn. Polîsan ew bi zorî ji wesayîtê derxistin. Dema derxistin jî heqaret li min kir. Şahidên vê bûyerê jî hene.” 

	 

	ZAROKÊ WÎ JÎ BIRÎNDAR BÛ

	 

	Bi domdarî Eşen gt ku zarokê wî jî di êrişê de birîndar bûye û axaftina xwe wiha qedand: “Polîsên din jî bi devkî êrişî min kirin. Ez wî polîsî bibînim dê nas bikim. Li nexweşxaneyê dîsa derket pêşiya min. Ji min pirsa ‘tu kî yî, kesê min pê re şer kirî tu yî?’ kir. Got; ‘ez di wê navberê de bihêrs bûm, min nekarî xwe kontrol bikim, li min bibore.’ Li cem wî çendek polîsên din jî hebûn. Diviya her tişt ewqas bi hêsanî nebûya. Tu tiştek li holê nebû lê êriş kir. Ev xeletî nîne, wî polîsî sûc kir. Te tiştek nekiriye lê rastî tundiyê tê. Polîsên li rex wî jî bêdeng dimînin. Zarok giriya û ji tirsan ser qoltixa piştê kete xwarê. Serê wî werimî. Serê wî li hesinê qoltixê ket û niha di muşahedeyê de ye. Piştî ev birîna wî baş bû dê li bandora psîkolojîk binêrin. Min serî li dozgeriyê da. Di rapora derbkirinê de qala birînên li ser çav, sing û milên min tê kirin. Ez dixwazim kesê ev bûyer kirî hesabê bide.” 

	 

	MA / Fethî Balaman