Saziyên Amedê serdana rojnamevanên hatin berdan kirin 

2023-07-21 19:18:26


	 

	AMED - Şaxa ÎHD’a Amedê û Platforma Ked û Demokrasiyê ya Amedê serdana rojnamegerên hatin berdan kirin û destnîşan kirin ku wê piştevaniya wan a ji bo çapemeniya azad bidome.

	 

	Şaxa Komeleya Mafên Mirovan a Amedê (ÎHD) û Platforma Ked û Demokrasiyê ya Amedê serdana rojnamegerên hatin berdan kirin. Serdan di avahiya Komeleya Rojnamegeran a Dîcle Firatê (DFG) de hat kirin. Hevserokê DFG’ê Serdar Altan, rojnameger Zeynel Abîdîn Bûlût û Hakki Boltan nûnerên saziyê pêşwazî kirin.  Di serdanê de saziyan bal kişandin ser pêştevaniyê û banga xwedî derketina Çapemeniya Azad kirin. Hevserokê ÎHD yê Amedê Abdûllah Zeytûn, Seroka Odeya Tabîbên Amedê Elîf Tûran, Serokê Odeya Endezyarên Zîraatê Samet Ûcûman, Hevserokê Hejmara 1’an a Egîtîm Sen a Amedê Zulkuf Guneş û endamên saziyên sivîl di serdanan de amade bûn. 

	 

	Hevserokê ÎHD’ê Abdûllah Zeytûn destnîşan kir ku heke çapemeniya kurd tune be parêzvanên mafên mirovan jî nikarin dengê xwe ragihînin. Zeytûn diyar kir ku divê piştevaniya çapemeniya kurd bê kirin û têkiliyên saziyên sivîl xurttir bibin. 

	 

	Dû re Seroka Odeya Tabîbên Amedê Elîf Tûran axivî û da zanîn ku wan dîsa pêvajoyek bê hiqûqî derbas kirine û wiha got: “Hêvî dikim ku ev pêvajo bi dawî bibe, lê wisa xûya dike ku wê bidome. Em bi çapemeniya azad serbilindin û em hertim bi we re ne. Hêvî dikim careke din tiştek neyê serê çapemeniya azad û saziyên ku kar û xebatên xwe dimeşînin. Çi bikeve ser milên me em ê bikin, derbasî be.”

	 

	Rojnamevan Altan û Bûlût xêrhatina saziyan kirin û ji bo piştevaniyê jî spasiyên xwe anîn ziman.