
ÎHD’a Îzmîrê: Bila faîlên Ferhat Tepe werin darizandin 

2023-07-29 14:20:42


	ÎZMÎR - ÎHD’a Îzmîrê di çalakiya “Bila winda bên dîtin û faîl bên darizandin” xwest faîlên nûçegihanê rojnameya Ozgur Gundemê Ferhat Tepe yê di binçavan de hat qetilkirin, bên darizandin.&nbsp;

	&nbsp;

	Şaxa Komeleya Mafên Mirovan (ÎHD) a Îzmîrê ku ji du hefteyan carek çalakiya “Bila winda bên dîtin û faîl bên darizandin” li dar dixe, li ber Sumerbanka Kevn a li Konakê pêk anî. Di çalakiyê de pankartên bi nivîsa “Winda wîjdan in xwedî lê derkeve” û “Faîl diyar in winda li ku ne?” hatin vekirin. Hevberdevkê Partiya Çepên Kesk Îbrahîm Akin, parlamentera Partiya Çepên Kesk Burcugul Çubuk û gelek nûnerên partiyên siyasî û rêxistinên sivîl tev li çalakiyê bûn.&nbsp;

	&nbsp;

	Vê hefteyê li faîl-kujerên nûçegihanê rojnameya Ozgur Gundemê Ferat Tepe yê di 28’ê tîrmeha 1993’yan de li Bedlîsê hat binçavkirin û piştre qetil kirin, hat pirsîn.&nbsp;

	&nbsp;

	Rêveberê ÎHD’ê Alî Aydin daxuyanî da û serpêhatiya windakirina Tepe vegot. Aydin anî ziman ku Ferhat Tepe bi îşkenceyê hatiye qetilkirin û heta niha tu encamek ji doza wî derneketiye û kujer-faîl nehatine dîtin. Aydin xwest kujer-faîlên Ferhat Tepe bên dîtin û cezakirin. Aydin diyar kir ku ew dixwazin zirxa parastin li ser Korkmaz Tagma yê tiliya wî di kuştina Tepe de heye bê rakirin.&nbsp;

	&nbsp;

	Daxuyanî piştî çalakiya rûniştinê bi dawî bû.&nbsp;

	&nbsp;