Nameyên girtiyan bi hinceta ‘ewlehiyê’ tên desteserkirin  

2023-08-10 11:25:43


	 

	MÊRDÎN - Girtiya bi navê Nûrcan Aslan ku li Girtîgeha Tîpa T a Tarsûsê tê ragirtin, diyar kir ku rêveberiya girtîgehê hewl dide tecrîda heyî girantir bike û nameyên ji bo ÎHD’ê dişînin jî bi hinceta “ewlehiyê” tên desteserkirin. 

	 

	Girtî Nûrcan Aslan ku li Girtîgeha Jinan a bi Tîpa T a Tarsûsê tê ragirtin, li ser telefonê bi malbata xwe re axivî û binpêkirinên li girtîgehê vegot. Aslan, da zanîn ku nameyên ku ji bo rojnameger û Komeleya Mafên Mirovan (ÎHD) dişînin nayên şandin, bi hinceta “ewlehiyê” tên desteserkirin û ev agahî parve kir: “Em dixwazin têkildarî binpêkirinên heyî ji rojnameger û ÎHD’ê re nameyan bişînin. Lê belê bi hinceta ‘ewlehiyê’ nayên şandin û tên desteserkirin. Nahêlin dengê me li derve bê bihîstin. Naxwazin em van binpêkirinan bi raya giştî re parve bikin.” 

	 

	DIXWAZIN TECRÎDÊ GIRANTIR BIKIN 

	 

	Bi domdarî Aslan anî ziman ku nameyên wan bi awayekî keyfî tên desteserkirin û wiha dirêjî da axaftina xwe: “Çi muxatab jî nînin ku em pê re hevdîtinê bikin. Li qadên hevpar em dixwazin bi girtiyên din re bên ba hev lê ev yek jî bi hinceta ‘xetereya ewlehî û tevgera komî’ tê astengkirin. Di heman demê de çalakiyên civakî tên astengkirin. Êdî hatiye astekî wisa ku em bi zor û zehmet ji odeyên xwe derdikevin. Dema kesek nexweş dikeve jî hefteyeke piştre dibin revîrê. Dixwazin dengê me qut bikin. Dixwazin tecrîda heyî hêj girantir bikin.” 

	 

	ÎNFAZA 3 JINAN HATE ŞEWITANDIN

	 

	Di berdewamê de Aslan destnîşan kir ku bi hinceta ku poşmantî qebûl nekirine, heta niha înfaza girtiyên bi navên Leyla Nergîz, Fatma Berfe û Elîf Kaya hatine şewitandin û wiha bi dawî kir: “Derfetê didin girtiyên edlî ku li ser telefonê 90 deqeyan biaxivin. Lê nahêlin em 10 deqeyan jî biaxivin. Bi vê yekê re bi eşkereyî ji me re vê dibêjin; ‘hûn çi sûc dikin bikin lê xebatên siyasî nekin.’”