
Tiryakî: Em ê dawî li siyaseta qeyûmtiyê bînin  

2023-08-26 17:07:42


	&nbsp;

	MERSİN - Parlementerê Partiya Çepên Kesk Mehmet Ruştu Tiryakî, diyar kir ku ew bi awayekî bi hêz amadekariyên hilbijartinên herêmî dikin û got: "Em ê dawî li siyaseta qeyûmtiyê bînin."&nbsp;

	&nbsp;

	Rêxistinên Mêrsînê yên Partiya Demokratîk a Gelan (HDP) û Partiya Çepên Kesk, di çarçoveya xebatên jinûvesazkirinç de li Hêwana Dawetan a Hasretê ya li navçeya Akdenîzê konferansa bajêr li dar xistin. Li hêwana konferansê pankarta bi tirkî û kurdî ya li ser "Di pêvajoya jinûvexwesazkirinê de bi ruhê azad, wekhevî û şoreşgerî ya Neteweya Demokratîk em konferansa xwe ya bajêr pêk tînin" nivîsandî hat daliqandin. Parlementerê Partiya Çepên Kesk ê Êlihê Mehmet Ruştu Tiryakî, Parlementerê Mêrsînê Alî Bozan, rêveberên bajêr û navçeyê û nûnerên gelek saziyan tevlî konferansê bûn. Konferans bi deqeyeke rêzgirtinê ya ji bo kesên di têkoşîna demokrasî û azadiyê de jiyana xwe ji dest dane dest pê kir. Hevserokê HDP'a Mêrsînê Hoşyar Yildiz axaftina destpêkê ya konferansê kir.&nbsp;

	&nbsp;

	'ME PÊŞNIYAZ DI BIN 32 SERNAVAN DE KOM KIRIN'

	&nbsp;

	Paşê Parlementerê Êlihê Mehmet Ruştu Tiryakî axivî. Tiryakî got: "Me ji bo rojeva rast a gelê xwe, ji bo rexne û pêşniyazên wan civînên gel û komxebat li dar xistin. Em nirxandinên di van civînan de derketin holê esas digirin. Em dixwazin van pêşniyazan jî di konferansa xwe de bi encam bikin. Me pêşniyaz û rexne di bin 32 sernavan de kom kirin. Ev sernav dê bibin nexşerêya pêvajoya me ya jinûvesazkirinê."

	&nbsp;

	Tiryakî destnîşan kir ku ew bi vî awayî amadekariyên hilbijartinên herêmî dikin û got: "Teqez em ê dawî li siyaseta qeyûmtiyê bînin. Helbet ji bo me meseleya sereke meseleya kurdî ye. &nbsp;Doza çareserkirina meseleya kurd û doza esasgirtina mafên bingehîn ên gelê kurd, wekî netewprestiyê nayên wesfandin. Lê belê ji xeynî vê xeteke netewperestiya kevneperest a guh li çareserkirina meseleya kurdî nake heye. Armanca vê xetê ne çareserkirina meseleya kurd e, berjewendiyên eşîrtiyê ne. Ez yeqîn dikim ku dê ji civînê pêşniyaz û biryarên ku rêya me ronî bikin derkevin."&nbsp;

	&nbsp;

	Konferans piştî axaftinan bi awayekî ji çapemeniyê re girtî domand.&nbsp;