
Cerdevan ewilî li zarokan da û paşê jî mala wan gulebaran kir  

2023-09-02 15:08:00


	AGIRÎ - Hat zanîn ku li gundê Akbaraza Jor ê bi ser navçeya Giyadînê ve cerdevan Seyhan Kaya li sê zarokên birayên hev in daye û paşê jî mala wan gulebaran kiriye.&nbsp;

	&nbsp;

	Li gundê Akbaraza Jor ê bi ser navçeya Giyadînê ya Agiriyê ve 3 zarokên birayên hev ên duh ji bo pezê xwe biçêrînin çûn mezrayê. Cerdevanê bi navê Seyhan Kaya li zarokan da. Di êrişê de du milên zarokê 13 salî şikestin û zarokên din jî birîndar bûn. Bavê zarokan Resûl &nbsp;Taştan têkildarî bûyerê axivî û destnîşan kir ku wan giliyê cerdevan Seyhan Kaya kir.&nbsp;

	&nbsp;

	BERXIKÊN XWE YÊN WINDAYÎ NEDÎT LI ZAROKAN DA&nbsp;

	&nbsp;

	Hat gotin ku Seyhan Kaya yê berxikên wî winda bûne çûye mezrayê cem zarokên li şivantiyê dikirin û zarokan bi diziyê sûcdar kiriye û heqaret li wan kiriye. Cerdevanê çavsor ê ku berxikên xwe windayî di nava keriyê pez de nabîne li her sê zarokên ku birayên hev in dide û her du milên O.T., ê 13 salî dişikîne. Hat zanîn ku her du milên O.T., xistine alçiyê û dê sibê tev li ezmûna bûrsê bib.e&nbsp;

	&nbsp;

	HEM LI ZAROKAN DA HEM JÎ MALA WAN GULEBARAN KIR&nbsp;

	&nbsp;

	Cerdevan piştî li zarokan dide vê carê li bavê zarokan Resûl Taştan digere û gefan li wan dixwe. Hat zanîn ku cerdevan paşê jî diçe mala zarokan gulebaran dike. Resûl Taştan anî ziman ku gelek gule li mala wî ketine û got: “Ev cerdevan bi sîlehên dewletê malên xelkê gulebaran dikin û me dikujin.”&nbsp;

	&nbsp;

	KEYA JÎ GEF XWARIYE

	&nbsp;

	Taştan da zanîn ku piştî li Fermandariya Leşkeriyê ya Giyadînê îfadeyên Kaya hatin girtin hatiye berdan û keyayê gund Bakî Kaya ku kurapê Seyhan Kaya ye li wî geriyaye û gefan lê xwariye.&nbsp;

	&nbsp;

	PARLAMENTE SERDANA MALBATÊ KIR

	&nbsp;

	Parlamentera Partiya Çepên Kesk a Agiriyê Nejla Demîr piştî bûyerê çû serdana malbata Taştan û got ew ê di warê hiqûqî de bibin şopdarê meseleyê.&nbsp;

	&nbsp;