Polîsan kelûpelên parlamenter Nejla Demîr desteser kirin 

2023-10-06 12:52:36


	 

	ÎZMÎR - Polîsan bi ser avahiya HDP’a Îzmîrê de girtin. Polîsan nava otomobîla Parlamentera Partiya Çepên Kesk Nejla Demîr lêgerîn kirin û dest danîn kelûpelên wê. 

	 

	Li Îzmîrê polîsan bi ser avahiyên rêxistina bajêr û navçeyên Partiya Demokratîk a Gelan (HDP) ve girtin. Polîs hê jî lêgerînên xwe yên li avahiyên HDP’ê didomînin. Li aliyê din hat zanîn ku polîsan, nava otomobîla Parlamentera Partiya Çepên Kesk a Agiriyê Nejla Demîr jî lêgerîn kirine û dest danîne ser komputer û hin ewraqên wê. Her wiha polîsan nehişt Hevberdevkê Partiya Çepên Kesk Îbrahîm Akin û parlamenter Burcugul Çûbûk têkevin avahiyê HDP’ê. 

	 

	ÇÛBÛK: EV DER NE KARGEH E!

	 

	Çûbûk bertek nîşanî serdegirtina polîsan da û destnîşan kir ku lêgerîna otomobîla parlamenter bêhiqûqî ye. Çûbûk bi bîr xist ku parêzbendiya wesayîta parlamenteran heye û got: “Operasyona Alî Yerlîkaya ya ku ev hefteyeke didomîne, operasyona dijminatiya gel e. Em niha li pêşiya avahiyê HDP’ê yê bajêr in. Ketina me ya hundir tê astengkirin. Li vir sepaneke derhiqûqî heye.”

	 

	Çûbûk detnîşan kir ku polîsan ji wan re wiha gotine: “Hevserok hatin binçavkirin. Em li kargehê digerin.” Çûbûk anî ziman ku HDP ne kargeh e û got: “Ev hefteyek e ev bêhiqûqî berdewam dike. Em bi pêvajoyeke ku hiqûq nayê pêkanîn re rû bi rû mane." 

	 

	Çûbûk bi bîr xist ku operasyonên tên kirin bi êrişên Herêma Kurdistanê û Bakûr û Rojhilatê Sûriyeyê ve girêdayî ne û got: “Divê ev polîtîkaya şer a desthilatê hilbiweşe. Ev ne êrişeke ji rêzê ye. Ji bo tezkereya Iraq û Sûriyeyê ya ku dê were Meclisê, tê kirin. Ji ber ev şereke li hemberî kesên dijî tezkereyê têdikoşîn e. Em paş de gav navêjin. Em ê di Meclisê de jî, li derve jî, dijî vê yekê têkoşîna xwe bidomînin.”