
Dayikên Şemiyê bertek nîşanî dorpêça polîsan dan: Rêzê ji AYM’ê re bigirin 

2023-10-14 12:35:37


	&nbsp;

	STENBOL -&nbsp;Dayikên Şemiyê carek din hatin astengkirin û Qada Galatasarayê li wan hat qedexekirin. Dayikên Şemiyê xwestin ku rêz ji biryara AYM’ê ya “binpêkirinê” re bê girtin.&nbsp;

	&nbsp;

	Dayikên Şemiyê bi daxwaza li aqûbeta xizmên xwe winda bipirsin û faîl bên darizandin di hefteya 968’emîn de xwestin biçin Qada Galatasarayê û çalakiya xwe li dar bixin. Polîsan carek din dayikan asteng kir û tevî biryara “binpêkirinê” ya Dadgeha Destûra Bingehîn (AYM) jî destûr nehat dayîn û qad hat qedexekirin.&nbsp;

	&nbsp;

	Seroka Giştî ya Komeleya Mafên Mirovan (ÎHD) &nbsp;Eren Keskîn û gelek dayik û parêzvanên mafên mirovan tev li çalakiyê bûn. Dayik li ser Cadeya Îstîklalê meşiyan û xwestin bi qerenfîlên di destên xwe de biçin Qada Galatasarayê lê polîsan ew asteng kirin û dorpêç kirin.&nbsp;

	&nbsp;

	BIRYARA AYM’Ê BI BÎR XIST&nbsp;

	&nbsp;

	Hevseroka ÎHD’ê Eren Keskîn nerazîbûn nîşanî astengkirina polîsan da û wiha got: “Biryara AYM’ê bi ser her tiştî re ye. Qeymeqam nikare vê biryarê ji holê rake. Biryar ji jorê tê dayîn.”&nbsp;

	&nbsp;

	‘RÊZÊ JI AYM’Ê RE BIGIRIN’&nbsp;

	&nbsp;

	Xizma winda Masîde Ocak bi bîr xist ku Tirkiye li gorî xala duyemîn a Destûra Bingehîn dewleta “hiqûqê” ye û xwest rêzdarî ji biryara Dadgeha Destûra Bingehîn re bê girtin. Ocak anî ziman ku ev 6 meh in bi awayek dijhiqûqî çalakiya wan tê qedexekirin û binçavkirin û îro vay e dîsa tên binçavkirin. Ocak da zanîn ku biryara AYM’ê tê binpêkirin û heke îro destûr bihata dayîn wê ji bo Kerevan Îrmez ê 28 sal berê di binçavan de hat qetilkirin edaletê bixwestina.&nbsp;

	&nbsp;

	Ji xizmên windayan Besna Tosûn jî bertek nîşanî polîsan da û biryara “binpêkirinê” ya AYM’ê bi bîr xist.&nbsp;

	&nbsp;

	BINÇAVKIRIN&nbsp;

	&nbsp;

	Rojnamevanên ku çalakiyê dişopandin jî ji cihê dorpêçê hatin dûrxistin. Polîsan gelek çalakvan ji pişt ve kelemçe kirin û xistin binçavan.&nbsp;

	&nbsp;

	Parlamenterê HDP’ê yê berê Mûsa Pîroglû jî bertek nîşanî binçavkirin û qedexekirina çalakiyê da.&nbsp;

	&nbsp;

	&nbsp;

	&nbsp;

	&nbsp;