
Zextên li Girtîgeha Hejmar 2 ya Amedê zêde bûn: Malbatan serî li ÎHD’ê dan 

2023-10-19 11:59:13


	AMED - Ji ber zêdebûna zext û binpêkirinên mafan ên li Girtîgeha Hejmar 2 ya bi Ewlekariya Bilind a Amedê gelek malbatên girtiyan serî li Şaxa ÎHD’a Amedê dan.&nbsp;

	&nbsp;

	Girtîgeha Hejmar 2 ya bi Ewlekariya Bilind a Amedê bi zext û binpêkirinan di rojevê de ye. Di rojekê de 8 xizmên girtiyan piştî binpêkirinên di dema hevdîtina vekirî de serî li Şaxa Komeleya Mafên Mirovan (ÎHD) a Amedê dan.&nbsp;

	&nbsp;

	HEKE ZEXT BI DAWÎ NEBIN EM DÊ DEST BI GREVA BIRÇÎBÛNÊ BIKIN&nbsp;

	&nbsp;

	Ji serlêderan Hanim Eleftos got ku di dema hevdîtina bi hevjînê xwe Xemgîn Eleftos de rastî zexta gardiyanan hatiye. Eleftos, wiha got: “Destûrê nadin ku em silavê bidin girtiyên din ên hatine cihê hevdîtinê. Girtî nikarin ji çalakiyên weke çêkirina resman, lêxistina enstrumanan û hwd. sûdê bigirin. Girtiyên nexweş baş nayên tedawîkirin. Bi qasî tê xwestin dernaxînin cihê hewadariyê. Bihayên tiştên li kantînê zêde ne û vîtamîna xwarinan pir kêm e. Gotin ku heke ev zext bi dawî nebin, dê dest bi greva birçîbûnê bikin.”

	&nbsp;

	Eleftos, destnîşan kir ku zêdebûna zextan girêdana xwe bi tecrîda li ser Rêberê PKK’ê Abdullah Ocalan heye û banga hestiyariyê li raya giştî kir.&nbsp;

	&nbsp;

	‘MUYANEYA DESTKELEMÇEKIRÎ LI GIRTIYAN FERZ DIKIN’&nbsp;

	&nbsp;

	Dayika girtî Sabrî Yilmaz a bi navê Sabriye Yilmaz jî diyar kir ku kurê wê ev 10 sal in girtî ye û wiha got: “Nexweşiya dil pê re heye. Her wiha nexweşê gurçikan e. Divê bi rêk û pêk were tedawîkirin. Divê her mehê biçe nexweşxaneyê lê 3-4 mehan carekî dibin. Rapora wî heye ku divê 6 dermanan bi kar bîne lê tenê 4 dermanan didin. Ew derman jî di dema xwe de nayên dayîn. Dema dibin nexweşxaneyê û tînin û di dema tedawiyê de kelemçe lê tê ferzkirin.”&nbsp;

	&nbsp;

	Yilmaz, got ku her tim bi ser qawîşên girtiyan de tê girtin û pirtûkên girtiyan tên desteserkirin. Yilmaz, wiha dirêjî da axaftina xwe: “Dema em cil û bergan dibin, bi hinceta rengan nadin girtiyan. Di dema hevdîtinê de lêgerîna tazî li me tê ferzkirin. Xwarina kesekî didin 3 kesan. Xwarinên didin girtiyan bihîjyen nînin û bi qasî tê xwestin ava paqij nadin.”&nbsp;

	&nbsp;

	Yilmaz, da zanîn ku li dijî van zextan serî li ÎHD’ê dane û axaftina xwe wiha qedand: “Bila zextên li ser girtiyan bi dawî bibin. Bila girtiyên nexweş bên dermankirin. Bila hemû kes li dora girtiyan bicive û xwedî li wan derkeve.”&nbsp;

	&nbsp;