
Li Şirnexê serlêdanên li DEM Partiyê zêde dibin

2023-12-14 09:01:58


	ŞIRNEX - Li DEM Partiyê ji bo bidawîbûna serlêdanên bernamzetiya hilbijartinên xwecihî, hefteyek ma ye. Hevberdevka Komîsyona Qebûlkirina Serlêdanan a Şirnexê Siyajîn Bûrûmtekîn diyar kir ku heta niha zêdetirî 150 kesî serî li komîsyona wan dane û got ku dê ev hejmar zêde bibe.&nbsp;

	

	Hevberdevka Komîsyonê Siyajîn Bûrûmtekîn

	Partiya Wekhevî û Demokrasiyê ya Gelan (DEM Partî) li aliyekî xebatên hilbijartinên xwecihî dimeşîne û ji aliyê din ve jî ji bo bernamzetiyê serlêdanan qebûl dike. Serlêdanên bernamzetiyê ku dê di 20'ê kanûnê bi dawî bibin, li Komîsyona Qebûlkirina Serlêdanan a li DEM Partî ya Şirnexê tên kirin.&nbsp;

	&nbsp;

	Hevberdevka Komîsyonê Siyajîn Bûrûmtekînê diyar kir ku ew di pêvajoya diyarkirina komîsyonê de ku girîngiyê didin temsîliyeta wekhev a hemû dînamîkên civakê û got ku di vî warî de komîsyoneke ji 20 kesan pêk tê ava kirine. Bûrûmtekînê destnîşan kir ku di avakirina komîsyonê de girîngî dane şefafîbûn û bêalîbûnê û destnîşan kir ku di heman demê de wan teqez kiriye ku xizmên pileya yekem û duyemîn ên kesên di komîsyonê de cih girtine nikarin bibin namzet.&nbsp;

	&nbsp;

	‘DÊ SERLÊDAN ZÊDE BIBIN'

	&nbsp;

	Bûrûmtekînê diyar kir ku komîsyon her roj ji saet 09.00’ê sibehê heta 17.00’ê êvarê li avahiya partiyê serlêdanan qebûl dike û wiha got: “Heta niha zêdetirî 150 kesî serî li me daye. Di van serlêdanan de beşdariyeke xurt a hevalên ciwan û jin heye. Ji hemî derdorêm civakê serlêdan hene. Nêzîkî hefteyek maye ku heyama serlêdanê bi dawî bibe. Em wiha difikirin ku dê van rojan serlêdan zêdetir bibin."&nbsp;

	&nbsp;

	‘EM Ê BIXEBITIN'

	&nbsp;

	Bûrûmtekînê ku got "Dê di demeke nêz de hilbijartin çêbibe û em ê rêveberiyên xwecihî yên bajarên xwe diyar bikin" wiha dawî li axaftina xwe anî: "Ji bo em car din rêveberiyên xwe yên xwecihî bi dest bixin û car din kuçe û kolanên xwe sererast bikin em li bendê hevalên xwe yên dilxwaz in. Berê bi sedan hevalên me yên di şaredariyê de ji kar hatibûn avêtin û qeyûman hewl da wechê bajarên me biguherînin. Em bang li her kesî dikin ku bi xurtî li dora partiya xwe bibin yek û bi namzedên xwe yên hilbijartî re bixebitin da ku em wê wêraniya ku wan kiriye ji holê rakin û xizmeteke baş ji gelê xwe re bikin. Ên li vî bajarî dijîn em in û ji bo li vî bajarî gotina me derbasdar be, em ê heta dawiyê bixebitin."&nbsp;

	&nbsp;