Li Qamişloyê êrişên Tirkiyeyê hatin şermezarkirin 

2024-01-03 22:06:15


	 

	NAVENDA NÛÇEYAN - Înîsiyatîfa Gel a Qamişloyê soza berfirehkirina berxwedan û têkoşînê ya li dijî êrişên Tirkiyeyê dubare kir û bêdengiya rêxistinên mafên mirovan û rêxistinên navneteweyî şermezar kir.

	 

	Înîsiyatîfa Gel a Qamişloyê bi vedana 2 konên çalakiyê li taxa Enteriyê li kêleka sotemeniya Qamişlo û li nêzî depoyên li taxa Cûdî (Qanat Siwês a berê) êrişên Tirkiyeyê şermezar kirin. Di bin kon de wêneyên Rêberê PKK'ê Abdullah Ocalan û pankartên "Berxwedan jiyan e" hatin daliqandin.

	 

	Di çalakiya li taxa Enteriyê de li ser navê Însiyatîfa Gel a Qamişloyê Silêman Ehmed axivî û wiha got: "Sûc û binpêkirinên dewleta Tirk a dagirker li dijî gelê me rastiya wê ji me re eşkere dikin ku dewleta Tirk a dagirker tevahî qanûnan bin pê dike û êrîşî her kesê banga azadiya xwe dike."

	 

	Ehmed axaftina wiha domand: "Pêdiviya Rojava bi xelkê wê heye û divê dakevin qadan û çalakiyan li dar bixin."

	 

	′BERXWEDAN JIYAN E′

	 

	Hevseroka Meclisa Malbatên Şehîdan a Qamişloyê Şemsêxan Gulo axivî û wiha got: "Bi diruşma ′Berxwdan jiyan e′ em ê li dijî tevahî şêweyên êrişan û tundiya li dijî me li ber xwe bidin. Îro dewleta Tirk a dagirker bi tevahî hêza xwe êrişî me dike û binesaziya herêmê hedef digire ku îsrar û vîna gelê me bişikîne."

	 

	Yek ji fermandarên Meclisa Leşkerî ya Qamişloyê Mihemed Zêdan axivî û wiha got: "Dema hêzên leşkerî li Bakur û Rojhilatê Sûriyeyê hatin avakirin tenê li dijî komên terorîst şer kirin, ewlehî û îstîqrar li herêmê pêk anîn."

	 

	Zêdan wiha domand: "Rêxistinên navnteweyî ji bo rewabûna zêdegaviyên dewletên mezin dixebitin, ji ber wê dewletekê yan jî rêxistinekê tu daxuyanî der barê sûcên dewleta Tirk û Erdogan ên li dijî herêmên de nedan."

	 

	Çalakî bi daxuyaniyekê ji hêla Însiyatîfa Gel a Qamişloyê bi dawî bû. Endamê însiyatîfê û endamê TEV-DEM′ê Abid Îbrahîm daxuyanî xwend.

	 

	Di daxuyaniyê de hat gotin ku gelê Qamişlo biryara berxwedan û sekna li dijî Tirkiyeyê daye û dê bi çalakiyan êrişan şermezar bikin û dengê xwe bigihînin tevahî cîhanê.

	 

	Her wiha di daxuyaniyê de hate destnîşankirin ku divê rêxistinên navneteweyî bi erkên xwe rabin û êrişên Tirkiyeyê yên li ser herêmê bi dawî bikin û qada hawayî ya herêmê bigirin.

	 

	Çalakî bi diruşmên  "Berxwedan jiyan e", "Bijî berxwedana Qamişlo", "Bê Serok jiyan nabe" bi dawî bû.