
Xwişka Veysî Aktaş: Me rûyê girtiyên xwe ji bîr kiriye

2024-01-10 09:12:17


	AMED - Sabîha Aslan, xwişka Veysî Aktaş ê li Girtîgeha Ewlehiya Bilind a Tîpa F a Îmraliyê 34 meh in xeber jê nayê girtin, diyar kir ku rûyê xizmên xwe ji bîr kirine û ji bo hestiyariyê bang kir.&nbsp;

	Ji Rêberê PKK'ê Abdullah Ocalan û Omer Hayrî Konar, Hamîlî Yildirim û Veysî Aktaş ên li Girtîgeha Ewlehiya Bilind a Tîpa F a Îmraliyê 2 sal û 9 meh û 15 roj in tu agahî nayê girtin. Hevdîtinên parêzer û malbatan bi hinceta "cezayên dîsîplînê" tên astengkirin, lê sedema cezayan bi hinceta "dê di çapemeniyê de bên belavkirin" teblîxî parêzeran nayên kirin.&nbsp;

	&nbsp;

	Sabîha Aslan, xwişka Veysî Aktaş ê di sala 2015'an de sewqî Girtîgeha Girava Îmraliyê hat kirin, bertek nîşanî astengkirina hevdîtinan da û ji bo hestiyariyê bang kir.&nbsp;

	&nbsp;

	‘JI DENGÊ AŞTIYÊ DITIRSIN'

	&nbsp;

	Aslanê anî ziman ku xebernegirtina ji Îmraliyê ji ber pêkanînên bêhiqûqîtî û bêedaletiyê yên li Tirkiyeyê ye û got ku ya tê kirin dê bi kêrî Tirkiyeyê neyê û dê bibe sedema rûxandinên pergalî. Aslanê bilêv kir ku dê Tirkiye bi van bêhiqûqîtiyan tiştekî bi ser tiştekî nexe û got: “Ji ber ku dê dengê aştiyê ji qir bê, hevdîtinan asteng dikin. Ji ber ku aştî dê bi kirî hin hêz, hin mirov û hin kesên desthilatê neyê. Lê ev bêhiqûqî û bêedaletiya li Tirkiyeyê dibe sedema qeyrana aborî û kûrkirina dijminatiya di navbera mirovan de. Êdî bi navê hezkirinê bi mirovan re tiştek nemaye. Ev ji ber bêedaletiyê ye."&nbsp;

	&nbsp;

	‘ME RÛYÊ GIRTIYÊN XWE JI BÎR KIRIYE'

	&nbsp;

	Aslanê cezayên disîplînê yên tên birîn wekî "bahane"yê şîrove kir û pirsî ku kesekî girtî dê çi qasî karibe "bêdîsîplîniyê" bike. Aslanê anî ziman ku girtî ne li qadeke wiha ne ku bêdîsîplîniyê bikin û wiha pê de çû: “Ji ber van cezayan me rûyê girtiyên xwe ji bîr kiriye. Ger ew nekevin xewnên me, em ê dengê wan, sûretê wan ji bîr bikin. Em hatine wê astê. Em bi tu awayî nikarin hezkirina xwe, êşên xwe bi hev re parve bikin."&nbsp;

	&nbsp;

	‘EM JI BER ERDHEJÊ BI FIKAR IN'

	&nbsp;

	Aslanê erdhejên li Gemlîkê çêbûn jî bi bîr xist û got ku piştî erdhejê wan yekser telefonî parêzeran kiriye û hewl dane agahiyekê wergirin. Aslanê wiha domand: “Em bi fikar in. Li Tirkiyeyê îhtimal e erdhejên mezin çêbibin. Divê ev kes teqez ji wê girtîgehê derkevin. Di navbera Girtîgeha Îmraliyê û behrê de mesafeyek mezin nîn e. Di erdhejeke gengaz de dê xizmên me bi çarenûsa xwe re rû bi rû bên hiştin."&nbsp;

	&nbsp;

	Aslanê anî ziman ku li gel hemû hewldanan jî muxatabekî nabînin û got: "Gelo gava 8 sal, 9 sal, 24 salan tu xeberê ji xizmekî xwe negirin dê çi bikin?"

	&nbsp;

	AZADIYA FIZÎKÎ

	&nbsp;

	Aslanê da zanîn ku ji bo şikandina tecrîda li Îmraliyê divê her kes bi erka xwe rabe û wiha got: “Ev pirsgirêka mirovahiyê, pirsgirêka hemû cîhanê ye. Li ku derê zilm, neheqî, bêedaletî hebe divê welat û dewlet li dijî vê rabin. Îro li her derê şer heye. Ev hemû ji ber neheqî û bêdengiyê rû didin. Divê beriya her tiştî ev 4 girtî bi awayekî fizîkî azad bibin. Yên ku ji xwe re dibêjin 'em mirov in' û edalet û hiqûqê diparêzin divê berpirsyariya xwe bi cih bînin. Çima dema mijar tê ser kurdan, li Tirkiyeyê mafên mirovan esas nayên girtin? Gava mesele tê ser kurdan, çav û guhên her kesî girtî ne. Hemû kesên dibêjin em mirov in, çi bikeve ser milê wan divê bikın."&nbsp;

	&nbsp;

	MA/ Mujdat Can&nbsp;

	&nbsp;