Hevserokên Giştî yên DEM Partiyê êrişa li dijî dêrê şermezar kirin 

2024-01-28 14:37:06


	NAVENDA NÛÇEYAN - Hevserokên Giştî yên DEM Partiyê Tulay Hatîmogûllari û Tuncer Bakirhan êrişa li dijî Dêra Santa Marîayê şermezar kirin. 

	Li Stenbolê di dema ayîna yekşemê ya li Dêra Santa Marîa ya li Sariyer a Stenbolê êrişa çekdarî hat kirin û kesek hate kuştin. 

	 

	Hevserokên Giştî yên Partiya Wekhevî û Demokrasiyê ya Gelan (DEM Partî) Tulay Hatîmogûllari û Tuncer Bakirhan li ser hesabên xwe yên medyaya dijîtal êriş şermezar kirin. 

	 

	HEVSEROKAN ÊRIŞ ŞERMEZAR KIRIN 

	 

	Hatîmogûllari di peyama xwe de wiha got: “Ez êrişa di dema ayîna yekşemê ya Dêra Santa Marîayê şermezar dikim. Ji bo hemwelatiyê di êrişê de jiyana xwe ji dest dayî rehmetê û ji bo birîndaran jî şîfaya xêrê dixwazim. Ev êriş, encama polîtîkayên nefretê ye. Divê faîlên wê tavilê bên girtin û tevahiya berpirsyarên wê bên girtin. Em ê vê bûyerê bişopînin. Ji bo ku hemû gel û baweriyên cuda bikarin bi awayeke azad û wekhev bijîn, dê têkoşîna me bidome.” 

	 

	Bakirhan jî di peyama xwe de ev tişt anî ziman: “Em, êrişa çekdarî ya li dijî Dêra Santa Marîa ya Latîn Katolîk a li Sariyer a Stenbolê şermezar dikin. Ji bo hemwelatiyê jiyana xwe ji dest dayî rehmetê û ji bo birîndaran jî şîfaya xêrê dixwazin. Ev êriş, encama gotinên cihêkar û nefretê ye. Banga min li her kesî ew e ku li dijî vê êrişê bibin yek û berpirsyarên êrişê bên girtin.”