
Malbatên windakiriyan li 3 bajaran dengên xwe bilind kirin 

2024-03-30 15:54:43


	&nbsp;

	NAVENDA NÛÇEYAN - Malbatên windakiriyan ên bi daxwaza “Bila windakirî bên dîtin, faîl bên darizandin” çalakiyên xwe didomînin, li 3 bajaran dengê xwe bilind kirin. Malbatên windakiriyan li Amed û Êlihê aqûbeta Orhan Yakar û Ahmet Bûlmûş pirsîn, li Colemêrgê jî faîlên Munîr Saritaş ê hate qetilkirin pirsî.&nbsp;

	&nbsp;

	Şaxa Komeleya Mafên Mirovan (ÎHD) a Amedê û malbatên windakiriyan bi dirûşma “Bila Windakirî bên dîtin, faîl bên darizandin” cara 790’emîn hatin bahev. Malbatan di çalakiya li ber Bîrdariya Mafên Mirovan a li Parka Koşûyolûyê lidarxistin de wêneyên xizmên xwe yên hatine qetilkirin û windakirin hilgirtin û pankarta ku wêneyên xizmên wan li ser vekirin.&nbsp;

	&nbsp;

	Di çalakiya vê hefteyê de aqûbeta Orhan Yakar ê di sala 1996’an de li Çewligê bi darê zorê hate windakirin hate pirsîn. Endama Komîsyonan Windayan a Şaxa ÎHD’ê Berfîn Elçî çîroka Yakar xwend. Pişt re deqîqeyekê çalakiya rûniştinê hate lidarxistin.&nbsp;

	&nbsp;

	ÊLIH&nbsp;

	&nbsp;

	Li Êlihê jî Şaxa ÎHD’ê û malbatên windakiriyan bi daxwaza “Bila windakirî bên dîtin, faîl bên darizandin” cara 626’an li ser Cadeya Gulistanê bûn. Di çalakiya vê hefteyê ya malbatên windakiriyan û parazvanên mafên mirovan aqûbeta Ahmet Bûlmûş ê di 1’ê nîsana 1994’an de piştî li navçeya Cizîr a Şirnexê hate binçavkirin careke din agahî jê nehate wergirtin pirsîn.&nbsp;

	&nbsp;

	Rêveberê Şaxa ÎHD’ê Reşît Çetînkaya çîroka Bûlmûş parve kir. Dû re malbatên girtiyan û parazvanên mafên mirovan bi çalakiya rûniştinê daxuyaniya xwe bi dawî kirin.&nbsp;

	&nbsp;

	COLEMÊRG&nbsp;

	&nbsp;

	Şaxa ÎHD’a Colemêrgê û malbatên windakiriyan di hefteya 116’emîn a çalakiya xwe de li Kolana Hunerê ya Geverê hatin bahev. Rêveberên DEM Partiyê yên Geverê, Dayikên Aştiyê û malbatên windakiriyan tev li çalakiyê bûn. Di çalakiyê de pankarta “Bila windakirî bên dîtin û faîl bên darizandin” hate vekirin û wêneyên kesên hatine windakirin û qetilkirin hatin hilgirtin. Di çalakiya vê hefteyê de faîlê Munîr Saritaş ê di 27’ê cotmeha 1995’an de li Geverê ji aliyê leşkerên girêdayî Tabura Komando ya Geverê ku di bin fermandariya serdar Mehmet Emîn Yûrdakûl de bûn ve bi îşkenceyê hate qetilkirin hate pirsîn.&nbsp;

	&nbsp;

	Endama Şaxa ÎHD’ê Pinar Zengîn, bal kişand ku li Tirkiyeyê darazeke ku bendewariya kesên mafên wan tên binpêkirin bi cih bîne tune ye û got: “Desthilateke ku hêza xwe ya siyasal ji bo pêkanîna edaletê bikarbîne nîne. Li dijî vê jî Dayikên Şemiyê hene.”

	&nbsp;

	Zengîn a ji bo di dosyaya Saritaş de edalet pêk were banga berpirsyartiyê li meqamên edlî û siyasî kir, wiha axivî: “Çend sal derbas bibin jî bila derbas bibin em ê ji bo Munîr Saritaş û hemû windakiriyên xwe dest ji daxwaza edaletê nekin.”

	&nbsp;

	‘DEWLET BERPIRSYAR E’&nbsp;

	&nbsp;

	Pişt re yek ji ferdên malbatê Munîr Saritaş, bal kişand ku faîl tên veşartin û xwest ku hêza li pişt faîlan were darizandin. Saritaş, bi bîr xist ku di komkujiyan de berpirsyartiya dewletê heye û got: “Faîl jî diyar in. Heke faîlan dadgeh berdin hemû berpirsyara van bûyeran dewlet e.”

	&nbsp;

	Daxuyanî piştî çalakiya rûniştinê bi dawî bû.&nbsp;

	&nbsp;

	&nbsp;