Buldan, Karay û Yildirim hatin bibîranîn: Li şûna Torosên spî îro rejîma qeyûm girtiye 2024-06-03 13:10:57   STENBOL - Hevseroka Giştî ya DEM Partiyê Tulay Hatîmogûllari di bîranîna karsaz Savaş Buldan, Adnan Yildirim û Haci Karay de axivî û wiha got: “Niha li şûna Torosên spî, rejîma qeyûm hatiye bicihkirin.”    Karsaz Savaş Buldan, Adnan Yildirim û Haci Karay ku di 2’yê hezîrana 1994’an de li Stenbolê hatibûn revandin û qetilkirin, di salvegera qetilkirina xwe de li ser gorên xwe hatin bibîranîn. Merasîma bîranînê li Goristana Avcilarê hat lidarxistin. Hevjîna Buldan, Parlamentera Partiya Wekhevî û Demokrasiyê ya Gelan (DEM Partî) ya Wanê Pervîn Buldan û xizmên wî, Hevseroka Giştî ya DEM Partiyê Tulay Hatîmogûllari, parlamenterên DEM Partiyê, ji Dayikên Şemiyê Hanim Tosun, siyasetmedar Sebahat Tuncel û gelek kes tev li bîranînê bûn. Di bîranînê de wêneyên Buldan, Karay û Yildirim hatin hilgirtin, merasîm bi deqeyek rêzgirtinê dest pê kir. Piştre jî beşdaran qurnefîl danîn ser gorên Buldan, Karay û Yildirim.    ‘DÎROK DÊ TIŞTÊN QEWIMÎN EFÛ NEKE’   Di bîranînê de ji ewil keça Adnan Yildirim, Ozlem Yildirim axivî. Yildirim, gotinên dapîra xwe ya erman a “hêvîdarim ku tiştên me kişandin zarok û neviyên me nekişînin” bi bîr xist û wiha got: “Li Tirkiyeyê îradeyeke siyasî tune ye lewma cînayetên kiryarên wan diyar nayên cezakirin. Polîtîkaya xelatkirina cezayan, ji salên 90’î heta niha rê li ber cînayetên dermirovî vekirin. Dê dîrok van tiştên qewimîn ji bîr neke û efû neke.”    Parlamenter Pervîn Buldan jî got ku 3’yê hezîranê ji bo wan rojeke reş heye. Buldan, wiha ev tişt anî ziman: “Dibe ku Savaş û hevalên wî bi awayekî fîzîkî di nav me de nebin lê nikarin fikr û ramanên wan ji me qut bikin. Kujer û tetîkkêşên ji qetilkirina van sê mirovan berpirsyar, yên bi dijminatî nêzî kurdan dibin, dê nekarin Savaş, Adnan û Haci ji dilê me derxînin. Bûn sedem ku zarokên me bêyî bavê xwe mezin bibin. Li vê erdnîgariyê ev ne kiryara ewil ne jî ya dawî ye. Ji Mûsa Anter heta Mehmet Sîncaran, bi sedan hevalên me bi vî awayî qetil kirin. Li vê erdnîgariyê heke tu kurd bî, yan dê bikevî girtîgehê, yan jî dê werî sirgunkirin. Ev zîhniyeta ku mafê jiyanê yê kurdan qebûl nake, hêj îktîdar e.    Em dizanin ka kê ev cînayet kirine. Faîlên wan li kolanan bi rehetî digerin. Ev komkujî bi fermana Tansu Çîller û Mehmet Agar hatin kirin. Lê yek ji van faîlan hesab nedan û nehatin cezakirin. Ji ber van komkujiyan divê lêborînê ji gelê kurd bixwazin. Heta kujer tên darizandin û cezakirin dê têkoşîna me bidome. Heke li vî welatî tu ji ber kurdbûna xwe bêyî kuştin û girtin, divê mirov bifikire û têkoşînê mezintir bike. Dê têkoşîna Dayikên Şemiyê û Dayikên Aştiyê mezintir bibe.”    'DINYA GELÊ KURD NAS DIKE’   Hevseroka Giştî ya DEM Partiyê Tulay Hatîmogûllari jî got ku ew êşa malbatan parve dikin û xwedî li têkoşîna wan derdikevin. Hatîmogûllari, wiha domand: “Hevalên me Savaş Buldan, Haci Karay û Adnan Yildirim zexta nokerî û cerdevantiyê red kirin. Ev karsazên kurd mîna rewşenbîr û demokratên Tirkiyeyê hedef hatin girtin. Faîlên wan eşkere bûn. Di Lijneya Ewlewhiya Neteweyî de lîsteya karsazên kurd ên dê bên kuştin derket holê. Mehmet Agar û Tansu Çîller ev lîsteye îmze kiribûn. Faîlên wan tevî belgeyan pêşkeşî dadgehan hatin kirin lê wan kuştina karsaz, rewşenbîr û nivîskarên kurd rewa dîtin. Tevî ewqas kuştinan jî têkoşîna azadî û demokrasiyê mezin bû. Têkoşîna gelê kurd ne tenê li Tirkiyeyê, li her çar parçeyên Kurdistanê mezintir dibe. Wan salan tu kesî gelê kurd nas nedikir lê niha hemû dinya nas dike. Anku cînayetên kiryarên wan diyar encamekî nade. Divê rêveberên Tirkiyeyê êdî dev ji vê plana têkbirinê berdin.    EM Ê RÊ NEDIN ZÎHNIYETA QEYÛMPARÊZ   Divê pirsgirêka kurd bi rêyên aştiyane û demokratîk were çareserkirin. Em careke din dibêjin; pirsgirêka kurd bi komkujî û girtinan çareser nabe. Em dibêjin me salên 90’î li pey xwe hiştine; şûna Torosên spî wesayîtên transporterên reş girtiye, niha şûna wan rejîma qeyûm û doza kompasê ya Kobanê girtiye. Îro di danê sibehê de qeyûm li Colemêrgê tayîn kirine. Ev feraseta ku îradeya gelê qebûl nake bila baş bizane ku gelê kurd dikare xwe bi xwe birêve bibe. Zîhniyeta qeyûmparêz û ya ev her sê hevalên me qetilkirî heman zîhniyete. Tişta ku Mehmet Agar û Tansu Çîller dikir îro Erdogan û Bahçelî dikin. Tevî vê jî em ê rê nedin wan û dê her li cem gelê kurd cih bigirin.”