
Platforma Piştevaniyê ya Penaberan: Divê sûcên nefretê bê ceza nemînin

2024-07-10 15:44:52


	&nbsp;

	ÎZMÎR - Platforma Piştevaniyê ya Penaberan a Îzmîrê ku têkildarî êrişên nijadperest ên li dijî penaberan daxuyanî da, destnîşan kir ku ji bo 4’emîn pêla lînckirinê ya mezin pêk neyê divê sûcên nefretê bê ceza nemînin.&nbsp;

	&nbsp;

	Platfroma Piştevaniyê ya Penaberan a Îzmîrê têkildarî êrişên li dijî penaberan li Şaxa Komeleya Mafên Mirovan (ÎHD) a Îzmîrê civîna çapemeniyê li dar xist. Li eywana ku daxuyanî lê hate dayîn pankarta “Li dijî nijadperestiyê em li kêleka penaberan e” hate daliqandin.&nbsp;

	&nbsp;

	Endama Platforma Piştevaniyê ya Penaberan a Îzmîrê Beydag Tiraş Onerî ya daxuyanî xwend, êrişên di 30’ê hezîranê de li dijî penaberan pêk hatin bi bîr xist û destnîşan kir ku êrişên nijadperest hefteyekê berdewam kirin. Onerî da zanîn ku herî dawî di encama êrişa nijadperest a li navçeya Serîk a Antalyayê de zarokê sûriyeyî yê bi navê Ahmed Hamdan Al Naîf hate qetilkirin û anî ziman ku di encama êrişên lincê û tundiya komî de penaber neçar man ku ji malên xwe dernekevin.&nbsp;

	&nbsp;

	‘MIDÛRIYETA POLÎSAN ÊRIŞ SOR KIRIN’&nbsp;

	&nbsp;

	Onerî, anî ziman ku hêzên ewlehiyê yên ji parastina penaberan berpirsyar, peywîra xwe pêk neanîn, ji bo ku êrişan bide rawestandin û pêşiyê li êrişên nû bigire tedbîr negirtine û wiha got: “Şeva ewil a êriş pêk hat, Midûrê Polîsan ê Kayseriyê yê hate taxê, hewl da koma êrişkar bi gotinên ‘mexdûr ne tirk e, sûriyeyî ye’ qaneh bike. Nasnameya mexdûrê derxist pêş û ev yek nayê qebûlkirin.”

	&nbsp;

	HIŞYARIYA 4’EMÎN PÊLA LÎNCÊ&nbsp;

	&nbsp;

	Onerî, bi bîr xist ku berpirsyarê êrişên li dijî penaberan desthilat û hevkarên wê û hin nûnerên mûxalefetê yên ji bo berjewendiyên xwe yên siyasî nijadperestiyê dikin in û wiha berdewam kir: “Dema pêlên lîncê yên di salên 2014, 2016 û 2019’an de pêk hatibûn difikirin, fikara me ji 4’emîn pêla lîncê ya mezin heye û ji bo ku rayedar tedbîran bigirin hişyar dikin.”

	&nbsp;

	‘DIVÊ SÛCÊN NEFRETÊ BÊCEZA NEMÎNIN’&nbsp;

	&nbsp;

	Onerî ya êrişên ku bûne sedemê sûcên nefretê şermezar kirin, ev tişt gotin: “Em dixwazin kesên tev li sûc û sûcan bûne li ber hiqûqê bên cezakirin. Divê mal, kargeh û wesayîtên di dema êrişan de zirara madî gihiştinê bên tazmînkirin. Divê cezayên nefretê bêceza nemînin, polîtîkaya necezakirinê ya rê li ber êrişên nû veke bi dawî bibe û di polîtîkaya koçberan de çareseriyên mirovî û mayînde bên pêşxistin. Em li dijî nijadperestiyê li cem penaberan e, em bi hev re têdikoşin.”

	&nbsp;

	&nbsp;