
Platforma Ked û Demokrasiyê ya Amedê ji bo 1’ê Îlonê bang kir

2024-08-30 14:56:18


	AMED - Platforma Ked û Demokrasiyê ya Amedê ji bo mitînga ku dê di 1’ê Îlonê Roja Aştiyê ya Cîhanê bê lidarxistin banga tevlibûnê kir û anî ziman ku li welat pêdiviya herî mezin aştî ye.&nbsp;

	&nbsp;

	Platforma Ked û Demokrasiyê ya Amedê têkildarî meş û mitînga ku bi boneya 1’ê Îlonê Roja Aştiyê ya Cîhanê dê li bajêr bên lidarxistin li Sendîkaya Kedkarên Zanîst û Perwerdehiyê (Egîtîm Sen) ya Hejmara 1’an a Amedê civîna çapemeniyê li dar xist. Di civînê de berdevkê Platforma Ked û Demokrasiyê ya Amedê yê Demê Ûfûk Bûlût diyar kir ku di ser Şerê Cîhanê yê Duyemîn re 85 sal derbas bûne, lê hêzên emperyalîst rê li ber şer, pevçûn û dijberiyên nû vekirine û got: “Civaka navneteweyî li hemberî kuştina kedkarên tenduristiyê û rojnamevanan ku di şer de jî divê nebin hedef bêdeng e.”

	&nbsp;

	Bûlût, wiha dirêjî da axaftina xwe: “Israra di polîtîkaya neçareserkirina pirsgirêka kurd de hatiye wê astê ku êdî mudaxileyî govend, dawet, muzîkan tên kirin û dibin hinceta girtinê. Bloka desthilatê di çarçoveya azadiya raman û îfadeyê de daxwaza herî biçûk a demokratîk, çalakî û aktîvîteyan vediguhere hinceta binçavkirinê û girtinê. Mafê gel ê bijartin û dengdayînê xesp dike û cara sêyemîn qeyûm tayîn dike.”

	&nbsp;

	‘PÊDIVIYA HERÎ MEZIN AŞTÎ YE’&nbsp;

	&nbsp;

	Bûlût, bal kişand ku li welat û cîhanê pêdiviya herî mezin aştî ye û wiha berdewam kir: “Em weke Platforma Ked û Demokrasiyê li dijî hemû êriş, şer, dijberî, ferzkirina tarzê jiyanê yê yek tîp bi israr û rêxistinkirî bi têkoşîneke bibiryar em ê parastina aştiyê bidomînin. Heta ku cîhanek û welatekî ku edalet, wekhevî, biratî, laîktî, parvekirin, hevkarî, hevgirtin û jiyaneke însanî lê mayînde bibe, em ê keliyekî jî dest ji têkoşîna aştiyê bernedin. Di vê çarçoveyê de em bang li herkesê dikin ku tev li çalakiyên ku dê di 1’ê Îlonê de bên lidarxistin bibin.”

	&nbsp;

	Daxuyanî bi dirûşma “Bijî aşitî” bi dawî bû.&nbsp;