
Emîne Şenyaşar li Meclisê li muxataban digere 

2024-09-02 14:16:49


	&nbsp;

	ENQERE - Nobeta Edaletê ya Emîne Şenyaşar a li Meclisê didome. Kurê wê Ferît Şenyaşar wiha bertek nîşan da: “Dayik li muxatabên ne polîs digere.”&nbsp;

	&nbsp;

	Emîne Şenyaşar ku hevjîn û du kurên wê di 14’ê hezîrana 2018’an de li Pirsûs a Rihayê ji hêla parastvan û xizmên parlamenterê AKP’ê yê berê Îbrahîm Halîl ve hatibûn qetilkirin û kurekê wê jî girtî, çalakiya xwe ya Nobeta Edaletê ya li pêşiya Meclisê daye destpêkirin didomîne. Çalakî îro di roja 12’an de domiya.&nbsp;

	&nbsp;

	BANG LI 85 MILYONAN DIKE

	&nbsp;

	Parlamenterê DEM Partiyê yê Rihayê û kurê Emîne Şenyaşar, Ferît Şenyaşar beriya çalakiyê li Meclisê daxuyanî da. Şenyaşar, wiha got: “Darazê tu edalet neda dayikê. Lewma me çalakî veguhest Meclisê. Piştî dayik hatî Meclisê, bangî 85 milyon kesan kir. Bang li Serokê Meclisê Nûman Kurtulmuş û Serokkomar Erdogan dike.”&nbsp;

	&nbsp;

	'DIXWAZE MECLIS BI PEYWIRA XWE RABE’&nbsp;

	&nbsp;

	Bi domdarî Şenyaşar anî ziman ku kesên komkujî kirin hêj niha jî li derve digerin û wiha pê de çû: “Bila parlamenterek derkeve daxuyaniyekê bide. Dayik, 846 rojan li pêşiya Edliyeya Rihayê, 124 rojan li pêşiya Wezareta Dadê û ev 12 roj in jî li Meclisê rûdine. Ji bo ev zilm bi dawî bibe, dixwaze Meclis li peywira xwe rabe.”&nbsp;

	&nbsp;

	Di berdewamê de Şenyaşar got ku polîsên Meclisê hewl didin dayikê asteng bikin û ev tişt anî ziman: “Dayik li Meclisê ji bilî polîsan dixwaze muxataban bibîne. Destê xwe deynin ser wijdana xwe û çareseriyekê peyda bikin.”&nbsp;

	&nbsp;

	Piştre jî Emîne Şenyaşar û Ferît Şenyaşar li pêşiya deriyê koma AKP û MHP’ê rûniştin. Şenyaşar a ku çalakiya xwe li ser kursiya biteker didomîne, komkujî vegot. Ji ber nexweşiyên xwe, Şenyaşar çalakiya xwe piştre li payerêya li ber derî domand.&nbsp;